୧୯ ବର୍ଷରୁ କମ୍ ଏସୀଆ କପରେ ଭାରତର ପରାଜୟ । ପାରମ୍ପରିକ ପ୍ରତିଦ୍ବନ୍ଦୀ ପାକିସ୍ତାନ ୩ ଓ୍ବିକେଟରେ ଜିତିନେଇଛି । ଭାରତର ଯୁବ ବ୍ୟାଟ୍ସମ୍ୟାନ ଅର୍ଜୁନରାଜପୁତଙ୍କ ଶତକ ପରେ ମଧ୍ୟ ଭାରତକୁ ପରାଜୟ ବରଣ କରିବାକୁ ପଡ଼ିଛି । ପାକିସ୍ତାନର ଓ୍ବିକେଟକିପର ବ୍ୟାଟ୍ସମ୍ୟାନ ହମଜାଙ୍କ ଅପରାଜିତ ଶତକ ଦଳକୁ ସଙ୍କଟରୁ ପାର୍ କରିଥିଲା । ୨୦୯ ରନର ବିଜୟ ଲକ୍ଷ୍ୟ ରହିଥିବାବେଳେ ୪୮ ଓଭର ଗୋଟିଏ ବଲରେ ପାକିସ୍ତାନ ୭ ଓ୍ବିକେଟ ହରାଇ ବିଜୟ ହାସଲ କରିପାରିଛି । ଦମଦାର ପ୍ରଦର୍ଶନ ପାଇଁ ହମଜା ପ୍ଲେୟାର ଅଫ୍ ଦ ମ୍ୟାଚ୍ ବିବେଚିତ ହୋଇଛନ୍ତି ।
କହି ରଖୁଛୁ କି, ଏହି ମ୍ୟାଚ୍ରେ ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଭାରତୀୟ ଦଳ ୪୬.୩ ଓଭରରେ ସମସ୍ତ ୱିକେଟ୍ ହରାଇ ୨୦୮ ରନ୍ କରିଥିଲା । ଭାରତ ପକ୍ଷରୁ ଅର୍ଜୁନ ରାଜପୁତ ସର୍ବାଧିକ ରନ୍ ସଂଗ୍ରହ କରିଥିଲେ । ସେ ମାତ୍ର ୮୫ ବଲରୁ ୧୦୭ ରନର ଦମଦାର ପାଳି ଖେଳିଥିଲେ । ଅନ୍ୟପଟେ କିମ୍ବଦନ୍ତୀ କ୍ରିକେଟରଙ୍କ ପୁଅ ଆର୍ଯ୍ୟବୀର ସେହ୍ୱାଗ ଏବଂ ଅନ୍ୱୟ ଦ୍ରାବିଡ଼ ଏହି ମ୍ୟାଚରେ ବ୍ୟାଟିଂରେ କୌଣସି ବଡ଼ କମାଲ କରିପାରି ନଥିଲେ । ପାକିସ୍ତାନ ପକ୍ଷରୁ ବୋଲିଂରେ ରିଜୱାନୁଲ୍ଲା, ଅଲ୍ଲୀ ରଜା ଏବଂ ନିକାବ ଶଫିକ୍ ୩ଟି ଲେଖାଏଁ ୱିକେଟ୍ ଅକ୍ତିଆର କରିଥିଲେ।
୨୦୯ ରନର ଲକ୍ଷ୍ୟର ପିଛା କରିବାକୁ ଓହ୍ଲାଇଥିବା ପାକିସ୍ତାନର ଆରମ୍ଭ ଅତି ଖରାପ ହୋଇଥିଲା। ଭାରତୀୟ ବୋଲରଙ୍କ ଘାତକ ଆକ୍ରମଣ ଆଗରେ ପାକିସ୍ତାନ ମାତ୍ର ୬୧ ରନ୍ ମଧ୍ୟରେ ନିଜର ପ୍ରମୁଖ ୫ଟି ୱିକେଟ୍ ହରାଇ ସଙ୍କଟରେ ପଡ଼ିଥିଲା। ଏଭଳି ପରିସ୍ଥିତିରେ ଲାଗୁଥିଲା ଯେ ଭାରତ ଏହି ମ୍ୟାଚକୁ ସହଜରେ ଜିତିନେବ, କିନ୍ତୁ ହମଜା ଜହୁର ଏବଂ ହସନୈନ ଅବାସ ମ୍ୟାଚର ମୋଡ଼ ବଦଳାଇ ଦେଇଥିଲେ। ଉଭୟ ଷଷ୍ଠ ଓ୍ବିକେଟରେ ୧୦୭ ରନର ପାର୍ଟନରସିପ କରି ଦଳକୁ ବିଜୟ ଭେଟି ଦେଇପାରିଛନ୍ତି ।
ହମଜା ଜହୁର ଦମଦାର ପ୍ରଦର୍ଶନ କରିଛନ୍ତି । ସେ ୧୦୮ ବଲରୁ ୧୦ଟି ଚୌକା ଓ ୩ଟି ଛକା ସହାୟତାରେ ଅପରାଜିତ ୧୦୦ ରନ୍ର ମ୍ୟାଚ୍-ୱିନିଂ ଇନିଂସ ଖେଳିଥିଲେ। ଶେଷ ମୁହୂର୍ତ୍ତରେ ଦଳକୁ ବିଜୟୀ କରାଇବା ସହ ସେ ନିଜର ଶତକ ମଧ୍ୟ ପୂରଣ କରିଥିଲେ। ପାକିସ୍ତାନ ୪୮.୧ ଓଭରରେ ୭ଟି ୱିକେଟ୍ ହରାଇ ୨୦୯ ରନ୍ ଲକ୍ଷ୍ୟକୁ ହାସଲ କରିନେଇଥିଲା । ଏହାସହ ପାକିସ୍ତାନ ଏହି ଟୁର୍ଣ୍ଣାମେଣ୍ଟରେ ଲଗାତାର ଦ୍ବିତୀୟ ବିଜୟ ହାସଲ କରିଛି ।
