ମାତ୍ର ୧୦ଦିନ ଭିତରେ ଖାଇବା ତେଲଠୁ ନେଇ ଡାଲି, ଚିନି ଓ ପରିବା ଦର ହୁହୁ ହୋଇ ବଢ଼ିଚାଲିଛି । ହାଟରେ ଗୋଟିଏ ଦର ଥିବା ବେଳେ ଖୁଚୁରା ଦୋକାନରେ ତାହା ୧୦ରୁ ୨୦ ଟଙ୍କା ଅଧିକ ଦରରେ ବିକ୍ରି କରାଯାଉଛି । ବାଇଗଣ, ଟମାଟୋ, କଲରା, ଗାଜର, ସଜନା ଛୁଇଁରେ ଆଉ ହାତ ମାରିହେଉନି । ଯାହା ପଚାରିବ, ସବୁ ୬୦ରୁ ୮୦ । ପୂର୍ବରୁ ଡାଲି ୧୨୦ ଟଙ୍କା ଥିବା ବେଳେ ଗତକାଲି ଏହା ୧୩୦ଟଙ୍କା ଛୁଇଁଛି । ଗତ ସପ୍ତାହକରେ ସୋରିଷ ତେଲ, ପାମୋଲିନ୍ ତେଲ ବଢ଼ିବଢ଼ି ଆସି ୧୮୦ରୁ ୧୯୦ଟଙ୍କା ଛୁଇଁଲାଣି । ଆଉ ଦିନେ କି ଦୁଇଦିନ ମଧ୍ୟରେ ଏହା ଦ୍ୱିଶତକ ମାରିବ । ଏଭଳି ସ୍ଥିତିରେ ସାଧାରଣ ଖାଉଟି କ’ଣ କରିବ? ଗୋଟିଏ ପଟେ ପେଟ୍ରୋଲ, ଡିଜେଲ୍ ଦର କନ୍ଦାଉଥିବା ବେଳେ ତେଲ, ପରିବା ଦର ବୃଦ୍ଧି ଖାଉଟିଙ୍କୁ ଶୋଷିଚାଲିଛି ।
ସୋମବାର ରାଜଧାନୀର ୧ନମ୍ବର ହାଟରେ ଅଧିକାଂଶ ପରିବା ଦର ସ୍ୱାଭାବିକ ଭାବେ ନିୟନ୍ତ୍ରଣରେ ରହିଥିଲା । ସଜନା ଛୁଇଁ କିଲୋ ୧୦୦, ବାଇଗଣ ୪୦ରୁ ୫୦, ଟମାଟୋ ୪୦, କାଙ୍କଡ଼ ୬୦, କଲରା ୪୦, ଚାଲାଣ ପୋଟଳ ୨୦, ଦେଶୀ ପୋଟଳ କିଲୋ ୩୦ରୁ ୪୦ଟଙ୍କା ଥିଲା । ହେଲେ ବିଭିନ୍ନ ମାର୍କେଟରେ ଯେଉଁ ପରିବା ଦୋକାନ ଅଛି, ସେଠି ବାଇଗଣ ୭୦ରୁ ୮୦, କଲରା ୬୦, କାଙ୍କଡ଼ ୮୦, ପୋଟଳ ୬୦ ଓ ଛୁଇଁ ୧୨୦ଟଙ୍କାରେ ବିକ୍ରି ହେଉଥିଲା । ଏପରିକି ଅଦା, ରସୁଣ ଦର ମଧ୍ୟ ୧୨୦ ଛୁଇଁଲାଣି । ପରିବା ଦର ବୃଦ୍ଧି ପାଇଁ ବେପାରୀମାନେ ପେଟ୍ରୋଲ, ଡିଜେଲ୍ ଦର ବୃଦ୍ଧିକୁ ଦାୟୀ କରିଛନ୍ତି । ଏବେ ପଶ୍ଚିମବଙ୍ଗ, ତାମିଲନାଡ଼ୁ, ବେଙ୍ଗାଲୁରୁ, ଉତ୍ତରପ୍ରଦେଶରୁ ପୋଟଳ, ଭେଣ୍ଡି, ଗାଜର, କଖାରୁ, ଅମୃତଭଣ୍ଡା ଆଦି ଆସୁଛି । ଗାଡି ଭଡ଼ା ବଢ଼ିଚାଲିଛି । ଏଭଳି ସ୍ଥିତିରେ ଗୋଟିଏ କିମି ପିଛା ୧ଟଙ୍କା ବଢ଼ିଛି । ସେହିହିସାବରେ ଦେଖିଲେ, ହାଟ ଦରଠୁ ୧୦ଟଙ୍କା ଅଧିକ ଦରରେ ପରିବା ଦର ବିକିବାକୁ ପଡ଼ୁଛି ବୋଲି ବେପାରୀ କହିଛନ୍ତି ।
ବଜାରରେ ଏବେ ସୋରିଷ ତେଲ ଦର ୧୯୦ ଓ ରିଫାଇନ୍ ତେଲ ୧୮୦ଟଙ୍କା ରହିଛି । ବର୍ଦ୍ଧିତ ଖାଇବା ତେଲ ଦରକୁ ନେଇ ଏବେ ଅକଳରେ ପଡ଼ିଛନ୍ତି ଗ୍ରାହକ । ଅପରପକ୍ଷେ, ରାଜ୍ୟବ୍ୟବସାୟୀ ମହାସଂଘର ସୂଚନା ଅନୁସାରେ, ଏବେ ଉତ୍ତରପ୍ରଦେଶ, ମଧ୍ୟପ୍ରଦେଶ, ଆନ୍ଧ୍ରପ୍ରଦେଶ, ରାଜସ୍ଥାନ, ପଶ୍ଚିମବଙ୍ଗର ଦିଘାରୁ ଖାଇବା ତେଲ ଯଥା-ସୋରିଷ ତେଲ, ସୂର୍ଯ୍ୟମୁଖୀ ତେଲ, ପାମୋଲିନ୍ ତେଲ ଆସୁଛି । ଓଡ଼ିଶାରେ ବାର୍ଷିକ ୫ଲକ୍ଷ ଟନ୍ ଖାଇବା ତେଲ ଆବଶ୍ୟକ । ସେହିଅନୁସାରେ, ବ୍ୟବସାୟୀମାନେ ତେଲ ଆଣୁଛନ୍ତି । ଆମଦାନୀ ଶୁଳ୍କ ବୃଦ୍ଧିପାଉଥିବାରୁ ଖାଇବା ତେଲ ଦର ବି ବଢ଼ୁଛି । ତେବେ ରାଜ୍ୟ ବ୍ୟବସାୟୀ ମହାସଂଘର ମହାସଚିବ ସୁଧାକର ପଣ୍ଡାଙ୍କ କହିବା କଥା, ଦରଦାମ ନିୟନ୍ତ୍ରଣ ପାଇଁ ଆମେ ସରକାରଙ୍କୁ ଏକ ପ୍ରସ୍ତାବ ଦେଇଥିଲୁ । ବର୍ତ୍ତମାନ ସରକାର ସେହି ପ୍ରସ୍ତାବ ଉପରେ କାମ କରନ୍ତୁ ।
