ଦୁଇ ସଫଳ ଦଳ ମୁମ୍ବାଇ ଓ ଚେନ୍ନାଇ ୱାଙ୍ଖଡ଼େ ଷ୍ଟାଡ଼ିୟମ୍ରେ ପରସ୍ପରକୁ ସାମ୍ନା କରିବେ । ଟୁର୍ଣ୍ଣାମେଣ୍ଟର ଏହି ୩୩ତମ ଲିଗ୍ ମ୍ୟାଚକୁ ନେଇ ଦର୍ଶକ ମହଲରେ ବେଶ୍ ଉତ୍କଣ୍ଠା ଲାଗି ରହିଛି । କାରଣ ମହେନ୍ଦ୍ର ସିଂହ ଧୋନି ଆଜି ଖେଳିବାର ଯଥେଷ୍ଟ ସମ୍ଭାବନା ରହିଛି । ଅବଶ୍ୟ ଚେନ୍ନାଇ ପକ୍ଷରୁ ଏପର୍ଯ୍ୟନ୍ତ କୌଣସି ସୂଚନା ଦିଆଯାଇ ନାହିଁ ।
ଧୋନି ବୁଧବାର ପାଖା ପାଖି ୪୫ମିନିଟ୍ କାଳ ୱିକେଟ୍ କିପିଙ୍ଗ କରିଥିଲେ ଓ ଦୀର୍ଘ ୧ ଘଣ୍ଟାରୁ ଅଧିକ ସମୟ ଧରି ନେଟ୍ସରେ ବ୍ୟାଟିଂ ଅଭ୍ୟାସ କରିଥିଲେ । ମୁମ୍ବାଇ ଦଳର ପ୍ରତ୍ୟେକ ଖେଳାଳି ସମୟ ସମୟରେ ଧୋନିଙ୍କ ନିକଟକୁ ଯାଇ ବାର୍ତ୍ତାଳାପ କରୁଥିବା ଦେଖିବାକୁ ମିଳିଥିଲା । ପଏଣ୍ଟ ତାଲିକାରେ ମୁମ୍ବାଇ ଓ ଚେନ୍ନାଇ ଯଥାକ୍ରମେ ସପ୍ତମ ଓ ଅଷ୍ଟମ ସ୍ଥାନରେ ରହିଛନ୍ତି । ଆଜିର ଫଳାଫଳ ପଏଣ୍ଟ ତାଲିକାକ ପ୍ରଭାବିତ କରିବ । ମୁମ୍ବାଇ ଜିତିଲେ ପଞ୍ଚମ ସ୍ଥାନକୁ ଉନ୍ନୀତ ହେବ । ଚେନ୍ନାଇ ଜିତିଲେ ଷଷ୍ଠ ସ୍ଥାନ ଦଖଲ କରିପାରିବ । ତେଣୁ ଉଭୟ ବିଜୟ ପାଇଁ ସବୁ ଶକ୍ତି ଲଗାଇବେ ।
ମୁମ୍ବାଇକୁ ୫ଥର ଚାମ୍ପିଅନ୍ କରାଇଥିବା ରୋହିତ ଶର୍ମାଙ୍କ ଖେଳିବା ନେଇ ଏପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ମିଳି ନାହିଁ । ତେବେ ଅଲ୍ରାଉଣ୍ଡର ୱିଲ ଜ୍ୟାକ୍ସ ଏକାଦଶରେ ସ୍ଥାନ ହାସଲ କରିବା ଏକ ପ୍ରକାର ନିଶ୍ଚିତ । ସେ ନିମ୍ନ ମଧ୍ୟ କ୍ରମରେ ବ୍ୟାଟିଂ କରିବେ ଓ ଆବଶ୍ୟକ ସ୍ଥଳେ ନୂଆ ବଲ୍ରେ ସ୍ପିନ୍ ବୋଲିଂ କରିବେ । ଗୁଜରାଟ ବିପକ୍ଷରେ ବିଜୟ ପରଠୁ ସମସ୍ତଙ୍କ ନଜର ତିଳକ ବର୍ମାଙ୍କ ଉପରେ ରହିଛି । ସେ ଉକ୍ତ ମ୍ୟାଚରେ ଶତକ ଅର୍ଜନ କରି ମୁମ୍ବାଇକୁ ବିଜୟଧାରାକୁ ଫେରାଇ ଆଣିଥିଲେ ।
ଚେନ୍ନାଇ ମଧ୍ୟ ତାଙ୍କୁ ଅଟକାଇବା ପାଇଁ ସ୍ୱତନ୍ତ୍ର ଯୋଜନା କରିବ । ରେକର୍ଡ ମୁମ୍ବାଇ ପକ୍ଷରେ ରହିଥିଲେ ହେଁ ଚେନ୍ନାଇ ପୂର୍ବ ବର୍ଷର ପ୍ରଦର୍ଶନକୁ ଦୋହରାଇବାକୁ ପ୍ରୟାସ କରିବ । ଉଭୟ ଦଳ ଇତି ମଧ୍ୟରେ ପରସ୍ପରକୁ ୩୯ଥର ଭେଟିଛନ୍ତି । ଏଥିରୁ ମୁମ୍ବାଇ ୨୧ଟି ମ୍ୟାଚ ଜିତିଥିବାବେଳେ ଚେନ୍ନାଇ ୧୮ଟି ମ୍ୟାଚରେ ବିଜୟୀ ହୋଇଛି । ଚେନ୍ନାଇ ଦଳ ଆହତ ଯନ୍ତ୍ରଣାରୁ ବାହାରି ପାରି ନାହିଁ । ଦଳର ଯୁବ ବ୍ୟାଟର ଆୟୂଷ ମାହତ୍ରେ ଆହତ ହୋଇ ବାଦ ପଡ଼ିବା ପରେ ଦଳର ସନ୍ତୁଳନ ବିଗିଡ଼ି ଯାଇଛି ।
ଆଜି ବ୍ୟାଟିଂ କ୍ରମରେ ବଡ଼ ପରିବର୍ତ୍ତନ ହେବା ନିଶ୍ଚିତ । ବୋଲିଂ ବିଭାଗ ପାଇଁ ମଧ୍ୟ ୱାଙ୍ଖଡ଼େ ଷ୍ଟାଡ଼ିୟମ୍ର ପିଚ୍ ଅଗ୍ନି ପରୀକ୍ଷା ସୃଷ୍ଟି କରିବ । ୱାଙ୍ଖଡ଼େ ଷ୍ଟାଡ଼ିୟମ୍ର ପିଚ୍ ବ୍ୟାଟିଂ ପାଇଁ ବେଶ୍ ଅନୁକୂଳ ରହିଥିଲେ ହେଁ ସଂଧ୍ୟା ସମୟରେ ପେସ୍ ବୋଲରଙ୍କୁ ସହାୟତା କରିଥାଏ । ଏଠାକାର ନାଲି ମାଟି ପିଚରେ ପେସ ବୋଲରମାନେ ଅତିରିକ୍ତ ବାଉନ୍ସ କରାଇଥାନ୍ତି । ରାତ୍ରିରେ କାକର ମଧ୍ୟ ପ୍ରଭାବ ପକାଇବ । ଫଳରେ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଦଳ
ମୁମ୍ବାଇ: କ୍ୱିଣ୍ଟନ ଡି କକ୍, ଡାନିଶ ମଲେୱର/ରୋହିତ ଶର୍ମା, ନମନ ଧିର, ସୂର୍ଯ୍ୟକୁମାର ଯାଦବ, ତିଳକ ବର୍ମା, ହାର୍ଦ୍ଦିକ ପାଣ୍ଡ୍ୟା(ଅଧିନାୟକ), ସେରଫାନ ରଦରଫୋର୍ଡ/ୱିଲ ଜ୍ୟାକ୍ସ, ମିଚେଲ ସାଣ୍ଟନର, କ୍ରିସ ଭଗତ, ଯଶପ୍ରୀତ ବୁମରା, ଆଲ୍ଲା ଗଜନଫର, ଅଶ୍ୱନୀ କୁମାର ।
ଚେନ୍ନାଇ: ସଞ୍ଜୁ ସାମସନ, ଋତୁରାଜ ଗାଏକୱାଡ୍(ଅଧିନାୟକ), ମାଥ୍ୟୁ ସର୍ଟ, ସର୍ଫରାଜ ଖାନ, ଡିୱାଲ୍ଡ ବ୍ରେଭିସ, ଶିବମ ଦୁବେ, ମହେନ୍ଦ୍ର ସିଂହ ଧୋନି, ଜାମି ଓଭରଟନ, ଅଂଶୁଲ କାମ୍ବୋଜ, ନୂର ଅହମ୍ମଦ, ମୁକେଶ ଚୌଧୁରୀ ।
