ମଧ୍ୟପ୍ରଦେଶର ଏକ ଗାଁରୁ ଉତରପ୍ରଦେଶ ପ୍ରୟାଗରାଜକୁ ଆସିଥିଲେ ମୋନାଲିସା । ମାଳା ବିକି ଦୁଇ ପଇସା ରୋଜଗାର ପାଇଁ ଏଠାକୁ ଆସିଥିବାବେଳେ ଏବେ ସାଉଁଟିଲେଣି ଅନେକଙ୍କ ଭଲପାଇବା, ଢ଼େରସାରା ଲୋକପ୍ରିୟତା ଓ ଚର୍ଚ୍ଚା । ଯେତିକି ଆକର୍ଷଣୀୟ ସେତିକି ସୁନ୍ଦର । ଶ୍ୟାମଳ ବର୍ଣ୍ଣର ଯୁବତୀଙ୍କ ହସ ମଧ୍ୟ ମତୁଆଲା କରିଛି । ଯେଉଁଠି ଯେଉଁଠି ସେ ପହଁଚୁଛନ୍ତି ତାଙ୍କ ପଛରେ ଭିଡ ଲାଗୁଛି । ମିଡିଆଠୁ ନେଇ ଏଠାକୁ ଆସୁଥିବା ଦେଶବିଦେଶର ତୀର୍ଥଯାତ୍ରୀଙ୍କ ସମସ୍ତଙ୍କ ଧ୍ୟାନ ମଧ୍ୟ ଆକର୍ଷଣ କରୁଛନ୍ତି ମଧ୍ୟପ୍ରଦେଶର ଯୁବତୀ ।
ତେବେ ଏହି ଲୋକପ୍ରିୟତା ମୋନାଲିସାଙ୍କ ପାଇଁ ସମସ୍ୟା ପାଲଟିଛି । ବାହାରକୁ ଯିବାକୁ ତାଙ୍କୁ ଭୟ ଲାଗୁଛି । ବ୍ୟବସାୟ ବନ୍ଦ, ସବୁ କିଛି ଠପ । ଟେଣ୍ଟରେ ଲୁଚିକି ରହିବାକୁ ପଡୁଛି । କେବଳ ସେତିକି ତାଙ୍କ ନାଁରେ ଫେକ ସୋସିଆଲ ମିଡିଆ ଆକାଉଣ୍ଟ କରାଯିବା ପରେ ଏହାକୁ ମଧ୍ୟ ଲକ୍ଷଲକ୍ଷ ଲୋକ ଫୋଲୋ କରୁଛନ୍ତି । ଅନ୍ୟପଟେ ନିଜ ସୁରକ୍ଷା ପାଇଁ ସେ ଚିନ୍ତାରେ ପଡିଛନ୍ତି ତାଙ୍କୁ ମେଳାରୁ ଉଠାଇ ନେବାକୁ ଧମକ ଦେବା ପରେ ଉତରପ୍ରଦେଶ ଯୋଗୀ ସରକାରଙ୍କୁ ସୁରକ୍ଷା ପାଇଁ ଗୁହାରୀ କରିଛନ୍ତି ।
ରାତାରାତି ସେଲିବ୍ରେଟି ପାଲଟିଥିବା ମୋନାଲିସାଙ୍କୁ ମିଳିଲାଣି ସିନେମା ଅଫର । ତେବେ ଅଫରକୁ ଗ୍ରହଣ ନକରି ଏବେ ସେ ଗାଁକୁ ଫେରି ଯାଇଥିବା ଜଣାପଡିଛି । ଏଥରକ ମହାକୁମ୍ଭ ପ୍ରଥମ ଦିନରୁ ହିଁ ଚର୍ଚ୍ଚାରେ ରହିଛି । ଭଳିକି ଭଳି ବାବାଙ୍କ ସହ ନାୟିକା ହର୍ଷାଙ୍କ ସାଧ୍ବବୀ ଅବତାର ମଧ୍ୟ ଖୁବ ଚର୍ଚ୍ଚା ସାଉଁଟୁଛି । ଏହା ଭିତରେ ନିଜ ସୌନ୍ଦର୍ଯ୍ୟ ପାଇଁ ପ୍ରୟାଗରାଜଠୁ ନେଇ ସାରା ଦେଶରେ ଖବର ପାଲଟିଛନ୍ତି ମଧ୍ୟପ୍ରଦେଶର ମୋନାଲିସା ।
