ନୂଆଦିଲ୍ଲୀ: ଓଡ଼ିଶାର ପୂର୍ବତନ ରାଜ୍ୟପାଳ ରଘୁବର ଦାସ ଶୁକ୍ରବାର ବିଜେପିରେ ପୁଣି ଥରେ ସାମିଲ ହୋଇଛନ୍ତି । ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ରଘୁବାର ଦାସ ପୁଣି ବିଜେପିର ସଦସ୍ୟତା ଗ୍ରହଣ କରିବା ପରେ ଦଳୀୟ ଶିବିରରେ ଉତ୍ସାହ ବୃଦ୍ଧି ପାଇଛି । ଏବେ ଝାଡ଼ଖଣ୍ଡ ରାଜନୀତିରେ ବିଜେପିର ରଘୁବର ଶକ୍ତି ବଢ଼ାଇବେ ବୋଲି କୁହାଯାଉଛି । ଏହ ପୂର୍ବରୁ ସେ ଡିସେମ୍ବର ୨୪, ୨୦୨୪ରେ ଓଡ଼ିଶାର ରାଜ୍ୟପାଳ ପଦରୁ ଇସ୍ତଫା ଦେଇଥିଲେ ଏବଂ ବିଜେପିରେ ପୁନଃ ସାମିଲ ହେବେ ବୋଲି ଚର୍ଚ୍ଚା ହେଉଥିଲା ।
ଗତ ଝାଡ଼ଖଣ୍ଡ ବିଧାନସଭା ନିର୍ବାଚନରେ ବିଜେପିକୁ ନିରାଶ ହେବାକୁ ପଡ଼ିଥିଲା ଏବଂ ଦଳ ପାଇଁ ରଘୁବର ଦାସ ଆବଶ୍ୟକ ଥିଲେ । ଏବେ ରଘୁବର ଦଳକୁ ପୁଣି ଥରେ ଫରିବା ପରେ ଝାଡ଼ଖଣ୍ଡରେ ବିଜେପିର ସ୍ଥିତି ଆହୁରି ମଜଭୁତ ହୋଇପାରିବ ବୋଲି ଚର୍ଚ୍ଚା ହେଉଛି । ଆଜି ରାଜ୍ୟ ବିଜେପି ମୁଖ୍ୟାଳୟରେ ରଘୁବର ଦାସ ଦଳରେ ସାମିଲ ହୋଇଛନ୍ତି । ଏହି ସମୟରେ ରାଜ୍ୟ ବିଜେପି ସଭାପତି ବାବୁଲାଲ ମାରାଣ୍ଡି, କାର୍ଯ୍ୟକାରୀ ସଭାପତି ରବୀନ୍ଦ୍ର ରାୟ, କେନ୍ଦ୍ରମନ୍ତ୍ରୀ ସଂଜୟ ସେଠ ଏବଂ ଶତାଧିକ ବିଜେପି କାର୍ଯ୍ୟକର୍ତ୍ତା ତାଙ୍କୁ ଦଳକୁ ସ୍ବାଗତ କରିଛନ୍ତି ।
ସେପଟେ ଦଳରେ ସାମିଲ ହେବା ପରେ ରଘୁବର ଦାସ କହିଛନ୍ତି, ୧୯୮୦ ପରେ ପୁଣି ଥରେ ବିଜେପିରେ ସାମିଲ ହୋଇଥିବାରୁ ଖୁସି ଲାଗୁଛି । ୨୦୨୩ରେ ଓଡ଼ିଶାର ରାଜ୍ୟପାଳ ହେବା ପରେ ସେ ଦଳରୁ ଇସ୍ତଫା ଦେଇଥିଲେ । ସେ କହିଛନ୍ତି, ୨୦୨୪ ବିଧାନଭା ନିର୍ବାଚନରେ ସବୁ ଦଳୀୟ ନେତା ମନପ୍ରାଣ ଦେଇ କାମ କରିଥିଲେ । କିନ୍ତୁ ଆମେ ଆଶାନୁରୂପ ଫଳ ପାଇଲୁ ନାହିଁ । ଏଥିପାଇଁ ଆମେ ଦୁଃଖିତ ନୁହେଁ, ଆମେ ଖୁବଶୀଘ୍ର ଫେରିବୁ ।
ସୂଚନାଯୋଗ୍ୟ, ୨୦୨୪ ଝାଡ଼ଖଣ୍ଡ ବିଧାନସଭା ନିର୍ବାଚନରେ ବିଜେପି କେବଳ ୨୧ ଆସନ୍ରେ ବିଜୟୀ ହୋଇଛି । ସେପଟେ ଜେଏମଏମ ନେତୃତ୍ବାଧୀନ ମେଣ୍ଟ ୫୬ଟି ଆସନରେ ବିଜୟୀ ହେବା ସହ ପୁଣି ଥରେ ସରକାର ଗଢ଼ିଛି । ତେବେ ରଘୁବର ଦାସ ଝାଡ଼ଖଣ୍ଡର ପ୍ରଥମ ଅଣ ଆଦିବାସୀ ମୁଖ୍ୟମନ୍ତ୍ରୀ । ସେ ୨୦୨୪-୨୦୧୯ ପର୍ଯ୍ୟନ୍ତ ରାଜ୍ୟର ଶାସନ ମୁଖ୍ୟ ଥିଲେ । ୨୦୧୯ ନିର୍ବାଚନରେ ଦଳର ପରାଜୟ ପରେ ତାଙ୍କୁ ଅକ୍ଟୋବର ୧୮, ୨୦୨୩ରେ ଓଡ଼ିଶାର ରାଜ୍ୟପାଳ ଭାବରେ ନିୁଯକ୍ତ କରାଯାଇଥିଲା ।
