ସଂଚାର ବ୍ୟୁରୋ: କାଲି ସ୍ତ୍ରୀ ଆଜି ବିଧାୟକ ହଟହଟା । ଚିକିଟି ବିଷାକ୍ତ ମଦ ମୃତ୍ୟୁ ଘଟଣା ଆଜି ମୃତକଙ୍କ ପରିବାର ଲୋକଙ୍କୁ ସାକ୍ଷାତ କରିବାକୁ ଯାଇ ହଟହଟା ହୋଇଛନ୍ତି ବଜେପି ବିଧାୟକ ମନୋରଞ୍ଜନ ଦ୍ଯାନସାମନ୍ତରାୟ । ଏତେ ବଡ଼ ଘଟଣା ଘଟିଗଲା । ବିଧାୟକଙ୍କୁ ଆଜି ଆସିବାକୁ ସମୟ ହେଲା ବୋଲି ପ୍ରଶ୍ନ କରିଥିଲେ ପରିବାର ଲୋକ । ଶବ ଧରି ରାସ୍ତା ରୋକବେଳେ ମଧ୍ଯ ଦେଖାମିଳିଲାନି । ସରକାର ବର୍ତ୍ତମାନ ପର୍ଯ୍ୟନ୍ତ ଦେଇଥିବା ପ୍ରତିଶ୍ରୁତି ପାଳନ କରିନାହାଁନ୍ତି । ଏପରି ସ୍ଥିତିରେ ବିଧାୟକ ହାତ ଧରିକି କ୍ଷମା ମାଗିଥିଲେ । ମଦ ମୃତ୍ୟୁ ଘଟଣାରେ ବିଧାନସଭା ହୁଲୁସ୍ତୁଲ ହେଲା । ସମସ୍ତ କାମ ଦେଖିବାକୁ ପଡିଲା । ତେଣୁ ଆସି ପାରିନଥିଲି ବୋଲି ସେ ସଫେଇ ଦେଇଥିଲେ । କାଲିକୁ ପାତ୍ରପୁର ଘର କିମ୍ବା କାର୍ଯ୍ୟାଳୟକୁ ଆସ ବୋଲି ମୃତକଙ୍କ ପରିବାରକୁ କହି ନିଜ କର୍ମୀଙ୍କୁ ନେଇ ଚାଲି ଯାଇଥିଲେ ବିଧାୟକ । ଏବେ ଏହାର ଭିଡିଓ ସାମାଜିକ ଗଣମାଧ୍ୟମରେ ଭାଇରଲ ହେଉଛି । ତେବେ କାଲି ତାଙ୍କ ପତ୍ନୀ ମୃତକଙ୍କ ପରିବାର ନିକଟକୁ ଯାଇଥିବା ବେଳେ ହଟହଟା ହୋଇଥିଲେ । ଆଉ ବିଧାୟକ କୁଆଡେ ଗଲେ ? ସେ ବର୍ତ୍ତମାନ ପର୍ଯ୍ୟନ୍ତ ଆସୁନାହାନ୍ତି କାହିଁକି ବୋଲି ପଚାରିଥିଲେ । ବିଧାୟକ କାହିଁକି ପ୍ରତିଶୃତି ଲୋକଙ୍କ ପାଖରେ ରଖୁନାହାନ୍ତି କି ପାଳନ କରୁ ନାହାନ୍ତି ବୋଲି ପଚାରିଥିଲେ । ତେବେ ଆଜି ବିଧାୟକ ହଟହଟା ହେବା ଘଟଣା ସାରା ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି ।
