ସଂଚାର ବ୍ୟୁରୋ: ଆଗକୁ ସୃଷ୍ଟି ହେବାକୁ ଯାଉଛି ଦୁଇ ଦୁଇଟି ଲଘୁଚାପ । ଏନେଇ ସୂଚାଇଛନ୍ତି ଅନ୍ତର୍ଜାତୀୟ ପାଣିପାଗ ବିଜ୍ଞାନୀ ଜାସନ ନିକୋଲସ । ଉତ୍ତର ଲାକ୍ଷାଦ୍ବୀପରେ ସୃଷ୍ଟି ହୋଇଥିବା ଲଘୁଚାପ ଉତ୍ତର ପଶ୍ଚିମ ଦିଗରେ ଗତି କରି ଆଗାମୀ କିଛି ଦିନରେ ଅବପାତର ରୂପ ନେଇପାରେ । ଏହାର ପ୍ରଭାବରେ ଆଗାମୀ ସପ୍ତାହ ଆରମ୍ଭରେ ଦକ୍ଷିଣ ଆରବିଆନ ପେନଜ୍ବାଲାରେ କିଛି ପରିମାଣର ବର୍ଷା ହୋଇପାରେ ବୋଲି ଚେତାଇଛନ୍ତି ନିକୋଲସ । ସେହିପରି MJO ଫ୍ୟାକ୍ଟର ଚତୁର୍ଥ ଏବଂ ପଞ୍ଚମ ଫେଜ୍ କୁ ଗତି କରୁଥିବାରୁ ଆଗାମୀ ସପ୍ତାହରେ ବଙ୍ଗୋପସାଗରରେ ଗୋଟିଏ ଲଘୁଚାପ ସୃଷ୍ଟି ହୋବାର ସମ୍ଭାବନା ଥିବା କହିଛନ୍ତି ଜାସନ ।
ଏପଟେ ମୌସୁମୀ ପ୍ରତ୍ୟାବର୍ତ୍ତନ ପାଇଁ ଅନୁକୁଳ ରହିଛି ପାଗ । ଆସନ୍ତା ଦୁଇ ଦିନ ମଧ୍ୟରେ ଲେଉଟାଣି ପ୍ରକ୍ରିୟା ଆରମ୍ଭ ହେବ। ଓଡ଼ିଶା ସମେତ ପଶ୍ଚିମବଙ୍ଗ ଓ ସିକ୍କିମର କିଛି ଅଞ୍ଚଳରୁ ଆସନ୍ତା ଦୁଇ ଦିନ ମଧ୍ୟରେ ଫେରିବ ମୌସୁମୀ । ସେହିଭଳି ଗୁଜରାଟ, ମଧ୍ୟପ୍ରଦେଶ, ଝାଡ଼ଖଣ୍ଡ, ବିହାରର ବାକି ଅଞ୍ଚଳରୁ ମୌସୁମୀ ପ୍ରତ୍ୟାବର୍ତ୍ତନ କରିବ । ଏହି ସବୁ ରାଜ୍ୟରେ ପୂର୍ବରୁ ମୌସୁମୀ ପ୍ରତ୍ୟାବର୍ତ୍ତନ ପ୍ରକ୍ରିୟା ଆରମ୍ଭ ହୋଇ ସାରିଥିଲା ।
