ସଂଚାର ବ୍ୟୁରୋ: ଝାଡ଼ଖଣ୍ଡରେ କଳ୍ପନା ଝଡ଼ । ବିଧାନସଭା ନିର୍ବାଚନରେ ଫାୟାରବ୍ରାଣ୍ଡ ନେତ୍ରୀ ସାଜିଛନ୍ତି କଳ୍ପନା ସୋରେନ । ମୁଖ୍ଯମନ୍ତ୍ରୀ ହେମନ୍ତ ସୋରେନଙ୍କ ପତ୍ନୀ କଳ୍ପନା ରାଜନୀତିରେ ପ୍ରବେଶ କରିବାର ବର୍ଷକ ମଧ୍ଯରେ ରାଜ୍ୟର ଜଣେ ପ୍ରମୁଖ ନେତ୍ରୀ ଭାବେ ନିଜକୁ ପ୍ରତିପାଦିତ କରିଛନ୍ତି । ବିଶେଷ କରି ଆଦିବାସୀ ମହିଳାଙ୍କ ଲାଗି ସେ ସାଜିଛନ୍ତି ଅନନ୍ଯ ନେତ୍ରୀ । ହେମନ୍ତ ଜେଲରେ ଥିବାବେଳେ ହୋଇଥିବା ଲୋକସଭା ନିର୍ବାଚନରେ ଇଣ୍ଡିଆ ମେଣ୍ଟକୁ ସଫଳତା ଦେବାରେ ତାଙ୍କ ରଣନୀତି ବେଶ୍ କାମ କରିଥିଲା । ରାଜ୍ଯରେ ହେଉଥିବା ନିର୍ବାଚନୀ ସଭାରେ କଳ୍ପନାଙ୍କ କ୍ରେଜ ନାହିଁ ନଥିବା ବୃଦ୍ଧି ପାଇଛି । ସେ ବର୍ତ୍ତମାନ ପାଲଟିଛନ୍ତି ରାଜ୍ଯର ଜଣେ ତୁଙ୍ଗ ଜନପ୍ରିୟ ନେତ୍ରୀ । ନିର୍ବାଚନୀ ସଭାରେ ସେ କେଉଁ ପ୍ରସଙ୍ଗ ଉତଥାପନ କରିବେ ତାହାକୁ ସେ ପୂର୍ବରୁ ପ୍ରସ୍ତୁତ କରିଥାନ୍ତି । ଏପରିକି ରାଜ୍ଯ ସରକାରଙ୍କ ସମସ୍ତ ଯୋଜନା ସମ୍ପର୍କରେ ସେ ତଥ୍ଯ ଉପସ୍ଥାପନ କରି ଲୋକପ୍ରିୟ ସାଜିଛନ୍ତି ।
ତାଙ୍କର ନେତୃତ୍ବ ସାମର୍ଥ୍ଯ, ଭାଷଣ ଶୈଳୀ ଓ ଦକ୍ଷତା ଆଦିବାସୀ ମହିଳା ଭୋଟରଙ୍କୁ ବେଶ୍ ପ୍ରଭାବିତ କରୁଛି । ସାରା ରାଜ୍ଯରୁ କଳ୍ପନାଙ୍କ ଭାଷଣ ଶୁଣିବା ଲାଗି ଦୈନିକ ଦଶରୁ ଅଧିକ ଅନୁରୋଧ ଆସୁଥିବା ସୂଚନା ମିଳିଛି । ପୂର୍ବ ସରକାର ଅମଳରେ ଆଦିବାସୀଙ୍କ ବିରୋଧରେ ଯେଉଁ ସବୁ ପଦକ୍ଷେପ ନିଆଯାଇଥିଲା ତାହାକୁ ଗୋଟି ଗୋଟି ବର୍ଣ୍ଣନା କରୁଛନ୍ତି କଳ୍ପନା । ବର୍ତ୍ତମାନ ଦୈନିକ ହାରାହାରି ପାଞ୍ଚଟି ଜନସଭାରେ ଉଦବୋଧନ ଦେଉଛନ୍ତି କଳ୍ପନା । କୁହାଯାଉଛି କଳ୍ପନାଙ୍କ ଜନସଭା ଗେମଚେଞ୍ଜର ହୋଇପାରେ । ବାହାର ରାଜ୍ଯରୁ ଆସୁଥିବା ବିଜେପି ମୁଖ୍ଯମନ୍ତ୍ରୀଙ୍କୁ ଟାର୍ଗେଟ କରିବାରେ ବି ମାହିର ଅଛନ୍ତି କଳ୍ପନା ।
ଏପରିକି ସ୍ବାମୀ ହେମନ୍ତ 10 ବର୍ଷରେ ଯେତିକି ହାସଲ କରିଛନ୍ତି କଳ୍ପନା ମାତ୍ର ବର୍ଷକ ମଧ୍ଯରେ ସେତିକି ହାସଲ କରିଛନ୍ତି ବୋଲି କହିଛନ୍ତି ସମର୍ଥକ । ୨୦୨୩ ଡିସେମ୍ବରରେ ଗାଣ୍ଡେୟ ଆସନର ଜେଏମଏମ ବିଧାୟକ ସର୍ଫରାଜ ଅହମ୍ମଦ ଇସ୍ତଫା ଦେବା ପରେ ଗତ ମେ ମାସରେ ସେଠାରେ ଉପନିର୍ବାଚନ ହୋଇଥିଲା । ସେହି ଆସନରୁ କଳ୍ପନା ପ୍ରାର୍ଥୀ ହୋଇ ବିଜେପିର ଦିଲୀପ ବର୍ମାଙ୍କୁ ପରାସ୍ତ କରିଥିଲେ । ଚଳିତ ନିର୍ବାଚନରେ ବିଜେପିର ମୁନିୟା ଦେବୀ, ଜେଏଲକେଏମର ମହମ୍ମଦ ଆକ୍ବିଲ ଅଖତାରଙ୍କୁ ଟକ୍କର ଦେଉଛନ୍ତି କଳ୍ପନା । କଳ୍ପନାଙ୍କ ପୈତୃକ ଗ୍ରାମ ମୟୂରଭଞ୍ଜ ଜିଲ୍ଲାରେ । ୧୯୮୫ରେ ଜନ୍ମିତ କଳ୍ପନା ହିନ୍ଦୀ ଓ ଇଂରାଜୀରେ ଅନର୍ଗଳ କହିପାରନ୍ତି ।
