ସଂଚାର ବ୍ୟୁରୋ: କୋର୍ଟ ମ୍ୟାରେଜକ କରୁଥିଲେ ସାବଧାନ। ନୋଟାରୀ ବିବାହ ଅବୈଧ। ନୋଟାରୀଙ୍କ ନିକଟରେ ହୋଇଥିବା ବିବାହ ବା ନୋଟାରୀଙ୍କ ଦ୍ବାରା ପ୍ରସ୍ତୁତ ବିବାହ ଦଲିଲ ଏଣିକି ଅବୈଧ ବିବେଚିତ ହେବ । ସେହିପରି ବିବାହ ବିଚ୍ଛେଦ ସଂକ୍ରାନ୍ତ ଦଲିଲ ମଧ୍ୟ ବୈଧ ବୋଲି ଗଣାଯିବ ନାହିଁ। କେନ୍ଦ୍ର ସରକାରଙ୍କ ଆଇନ ଓ ନ୍ୟାୟ ମନ୍ତ୍ରଣାଳୟ ପକ୍ଷରୁ ଏ ସଂକ୍ରାନ୍ତରେ ବିଧିବଦ୍ଧ ବିଜ୍ଞପ୍ତି ଜାରି ହୋଇଛି। ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ନୋଟାରୀମାନେ ବିବାହ ଅଧିକାରୀ ଭାବେ ନିଯୁକ୍ତ ହୋଇ ନ ଥାନ୍ତି । ନୋଟାରୀ ଆକ୍ଟ- ୧୯୫୨ ଅବା ନୋଟାରାଜ୍ ରୁଲ୍-୧୯୫୬ ଅନୁସାରେ ସେମାନେ ବିବାହ କିମ୍ବା ବିବାହ ବିଛେଦ ସମ୍ପର୍କିତ ଦଲିଲ୍ ପ୍ରସ୍ତୁତ କରିପାରିବେ ନାହିଁ । ନୋଟାରୀ ଆଇନ ୧୯୫୨ ଅନୁସାରେ ନୋଟାରୀଙ୍କ ନିକଟରେ ହୋଇଥିବା ବିବାହ ବା ବିବାହ ବିଚ୍ଛେଦକୁ ବୈଧ ବୋଲି ମାନ୍ୟତା ଦିଆଯାଇ ନାହିଁ ।
ସେହିପରି ୧୯୫୬ ନୋଟାରୀ ଆଇନରେ ମଧ୍ୟ ଏହାକୁ ସ୍ବୀକୃତି ଦିଆଯାଇ ନାହିଁ। ପୁନଶ୍ଚ କେବଳ ବିବାହ ନୁହେଁ, ବିଚ୍ଛେଦ କ୍ଷେତ୍ରରେ ମଧ୍ୟ ନୋଟାରୀଙ୍କ ନିକଟରେ ପ୍ରସ୍ତୁତ ଦଲିଲ ଅଦାଲତରେ ଗ୍ରହଣୀୟ ହେବ ନାହିଁ। ବିବାହ ଓ ବିଚ୍ଛେଦ ଦଲିଲ ବା ବିଚ୍ଛେଦ କାଗଜପତ୍ରକୁ ଅବୈଧ ବୋଲି କୁହାଯାଇଛି। ମାତ୍ର ବର୍ତମାନ ବିଭିନ୍ନ କ୍ଷେତ୍ରରେ ନୋଟାରୀମାନେ ବିବାହ, ବିବାହ ବିଚ୍ଛେଦ ସଂକ୍ରାନ୍ତ ଦଲିଲ ଓ ନପତ୍ର ପ୍ରସ୍ତୁତ କରୁଥିବା ଦେଖାଯାଉଛି । ଆଇନତଃ ଏହା ବୈଧ ନ ହେଲେ ମଧ୍ୟ ଏହାକୁ ବିଭିନ୍ନ ଅନୁଷ୍ଠାନ ସ୍ବୀକୃତି ଦେଉଛନ୍ତି । ଯାହାଦ୍ୱାରା ଭାରତ ସରକାର ପ୍ରଣୟନ କରିଥିବା ଆଇନର ଉଲଂଘନ ହେଉଛି ଏବଂ ଅନେକ କ୍ଷେତ୍ରରେ ବିଭ୍ରାଟ ସୃଷ୍ଟି ହେଉଛି ।
ଏହା ନୋଟାରୀଙ୍କ ଦାୟିତ୍ୱ ବା କାର୍ଯ୍ୟ ପରିସରଭୁକ୍ତ ହୋଇ ନ ଥିଲେ ମଧ୍ୟ ତାହାର ବହୁଳ ପ୍ରଚଳନ କରାଯାଉଛି I ତେଣୁ ନୋଟାରୀମାନେ ଏଥିରୁ ବିରତ ରହିବାକୁ କେନ୍ଦ୍ର ଆଇନ ଓ ନ୍ୟାୟ ମନ୍ତ୍ରଣାଳୟ ପରାମର୍ଶ ଦେଇଛି। ଏହାସହ ସାଧାରଣ ଜନତାଙ୍କ ପାଇଁ ମଧ୍ୟ ଏ ସଂକ୍ରାନ୍ତରେ ସତର୍କ ସୂଚନା ଜାରି କରାଯାଇଛି। ନୋଟାରୀମାନେ ଏହି କାର୍ଯ୍ୟ ସମ୍ପାଦନ କଲେ ତାହା ଅବୈଧ ଘୋଷିତ ହେବ। ଏବଂ ସମ୍ପୃକ୍ତ ନୋଟାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ପାରିବ ।
