ସଂଚାର ବ୍ୟୁରୋ: ପବିତ୍ର ଦଶହରା ପୁଜାରେ ବଙ୍ଗୀୟ ସଂପ୍ରଦାୟର ଭିନ୍ନପରମ୍ପରା ଦେଖିବାକୁ ମିଳିଥାଏ । ଦଶହରାରେ ମା’ ଦୁର୍ଗାଙ୍କ ନିକଟରେ ଦହିପଖାଳ ସାଙ୍ଗକୁ ସାରୁ ସାଗଭଜା ଭୋଗ ଲଗାଯାଇଥାଏ। ଦୁର୍ଗାମଣ୍ଡପରେ ମହିଳାମାନେ ଏକତ୍ରୀତ ହୋଇ ନିଜ ନିଜମଧ୍ୟରେ ସିନ୍ଦୁର ଖେଳିବାର ଦୃଶ୍ୟଦର୍ଶକ ଓ ଭକ୍ତମାନଙ୍କ ମନ ମୋହିଥାଏ ।
ଚଳିତ ବର୍ଷ ପବିତ୍ର ଦଶହରା ପୂଜା ଉତ୍ସବ ଅବସରରେ ମାଲକାନଗିରି ସହର ଦଣ୍ଡକାରଣ୍ୟ ସର୍ବଜନୀନ ଦୁର୍ଗା ପୂଜାମଣ୍ଡପ ରେ ମୂଖ୍ୟଆକର୍ଷଣ ଥିଲା ମହିଳା ମାନଙ୍କ ସିନ୍ଦୁର ଖେଳ । ଏହି ସିନ୍ଦୁର ଖେଳ ଦେଖିବାକୁ ଶତାଧିକ ମହିଳା ଓ ପୁରଷ ଙ୍କ ସହିତ ଶ୍ରଦ୍ଧାଳୁ ଭକ୍ତଙ୍କ ଭିଡ ଲାଗିଥିଲା । ଶତାଧିକ ସଧବା ଓ ନୁଆବିବାହିତା ବଙ୍ଗିୟ ଭାଷାଭାଷି ମହିଳାମାନେ ହାତରେ ପୂଜା ଥାଳି ଧରି ପୁଜା ମଣ୍ଡପ ନିକଟରେ ପହଁଚିଥିଲେ। ଧୂପ,ଦୀପ, ମିଠା, ଭୋଗ, ସିନ୍ଦୁର, ପାନପତ୍ର ନେଇ ମା’ ଦୁର୍ଗାଙ୍କୁ ପ୍ରଥମେ ବନ୍ଦାପନା କରି ମା’ ଙ୍କ ମୁଣ୍ଡରେ ସିନ୍ଦୁର ଲଗାଇ ମିଠା ଓ ପାନ ଖୁଆଇଥିଲେ। ବନ୍ଦାପନାପରେ ମା’ ଙ୍କ ସମ୍ମୁଖରେ ନିଜ ନିଜ ମଧ୍ୟରେ ସିନ୍ଦୁର ବୋଳା ବୋଳି ହୋଇ ମହିଳାମାନେ ସିନ୍ଦୁର ଖେଳ ଖେଳି କୋଳା କୋଳି ହୋଇ ପରସ୍ପରଙ୍କୁ ମିଠା ଖୁଆଇଥିଲେ । ସିନ୍ଦୁର ଖେଳ ସରିବା ପରେ ମା’ ଦୁର୍ଗାଙ୍କ ନିକଟରେ ଲଗାଯାଇଥିବା ସାରୁ ପତ୍ର(କଚୁ ସାଗ) ଭଜା ଓ ଦହିପଖାଳଭାତ ଭୋଗ କୁ ସମସ୍ତ ଦର୍ଶକ,ଭକ୍ତ ଓ ମହିଳା ମାନେ ପ୍ରସାଦ ଭାବେ ଖାଇଥିଲେ ।
