ଧାର୍ଯ୍ଯ ସମୟର ଗୋଟିଏ ଦିନ ଆଗରୁ ସରିଲା ଶ୍ରୀମନ୍ଦିର ରତ୍ନଭଣ୍ଡାର ସର୍ଭେ । ଲେଜର ସ୍କାନିଂ ଓ ରାଡାର ସର୍ଭେ କାର୍ଯ୍ଯ ଶେଷ ହୋଇଛି । ରାଡାର ସର୍ଭେର ତଥ୍ଯ ତର୍ଜମା କରାଯିବା ପରେ ପୂର୍ଣ୍ଣାଙ୍ଗ ରିପୋର୍ଟ ଆସିବ । ଏଥିପାଇଁ ଆହୁରି ୧0 ଦିନରୁ ଅଧିକ ସମୟ ଲାଗିପାରେ l ପୂର୍ଣ୍ଣାଙ୍ଗ ରିପୋର୍ଟ ମିଳିବା ପରେ ରତ୍ନଭଣ୍ଡାର ତଳେ ସୁଡ଼ଙ୍ଗ ଅଛି କି ନାହିଁ ସେ ସମ୍ପର୍କରେ ସ୍ପଷ୍ଟ ସୂଚନା ମିଳିପାରିବ । ସମ୍ପୂର୍ଣ୍ଣ ରିପୋର୍ଟ ମିଳିବା ପରେ ଏହାକୁ ନେଇ ବିଶେଷଜ୍ଞମାନଙ୍କ ପରାମର୍ଶ ଓ ମତାମତ ନିଆଯିବ । ବିଶେଷଜ୍ଞଙ୍କ ମତାମତ ତଥା ଛତିଶା ନିଯୋଗ ଓ ପରିଚାଳନା କମିଟିରେ ଆଲୋଚନା କରାଯାଇ ରାଜ୍ୟ ସରକାରଙ୍କ ନିକଟକୁ ସବିଶେଷ ତଥ୍ୟ ପ୍ରଦାନ କରାଯାଇ ମରାମତି ପାଇଁ ଅନୁମୋତି ଲୋଡ଼ାଯିବ । ଶୃଙ୍ଖଳିତ ଭାବେ ସବୁ କାର୍ଯ୍ଯ ସରିଥିବାରୁ ଶ୍ରୀମନ୍ଦିର ମୁଖ୍ୟ ପ୍ରଶାସକ ସମସ୍ତ ସେବାୟତ, ଏଏସଆଇ,ପୋଲିସ କର୍ମଚାରୀ ଓ ଶ୍ରଦ୍ଧାଳୁଙ୍କୁ କୃତଜ୍ଞତା ଜଣାଇଛନ୍ତି ।
