ସଂଚାର ବ୍ୟୁରୋ: ଜେଲରୁ ଆସିବା ପରେ ଦିଲ୍ଲୀ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଲେ ଅରବିନ୍ଦ କେଜ୍ରିଓ୍ବାଲ। ତାଙ୍କର ଇସ୍ତଫା ପରେ ସରକାର ଗଠନ କରିବା ନେଇ ଉପରାଜ୍ୟପାଳଙ୍କ ଆଗରେ ଦାବି ରଖିଛନ୍ତି ଆତିଶି। ଏହା ସହ ଖୁବ୍ ଶୀଘ୍ର ଶପଥ ନେବା ତାରିଖ ଦେବାକୁ କହିଛନ୍ତି। ଏଭଳି ସ୍ଥିତିରେ ଆତିଶିଙ୍କୁ ମୁଖ୍ୟମନ୍ତ୍ରୀ ଭାବରେ ଘୋଷଣା କରିବା କେବଳ ଆମ୍ ଆଦମୀ ପାର୍ଟି ପାଇଁ ଏକ ମାଇଲଖୁଣ୍ଟ ନୁହେଁ, ବରଂ ସେ ଭାରତୀୟ ରାଜନୀତି ଇତିହାସରେ ମହିଳା ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର କ୍ଲବରେ ସ୍ଥାନ ପାଇଛନ୍ତି।। ଆତିଶି ହେଉଛନ୍ତି ଦିଲ୍ଲୀର ତୃତୀୟ ମହିଳା ମୁଖ୍ୟମନ୍ତ୍ରୀ। ୧୯୯୮ରେ କଂଗ୍ରେସର ଶିଲା ଦୀକ୍ଷିତ୍ ଦିଲ୍ଲୀର ସିଏମ୍ ହୋଇଥିଲେ। ସେ ଏହି ପଦବୀରେ ୧୫ ବର୍ଷ ୨୫ ଦିନ ରହିଥିଲେ। ତାଙ୍କ ପରେ ବିଜେପିର ଫାୟାରବ୍ରାଣ୍ଡ ନେତ୍ରୀ ସୁଷମା ସ୍ୱରାଜ ୧୯୯୮ ରେ ମାତ୍ର ୫୨ ଦିନ ପାଇଁ ଦିଲ୍ଲୀର ମୁଖ୍ୟମନ୍ତ୍ରୀ ହୋଇଥିଲେ।ଶିଲା ଦୀକ୍ଷିତଙ୍କର ପ୍ରାୟ ଏକ ଦଶକ ପରେ ଦିଲ୍ଲୀରେ ଜଣେ ମହିଳା ମୁଖ୍ୟମନ୍ତ୍ରୀ ଫେରିଛନ୍ତି। ଏହା ସହ ଆତିଶି ଭାରତର ସବୁଠାରୁ କମ୍ ବୟସ୍କ ମହିଳା ମୁଖ୍ୟମନ୍ତ୍ରୀଙ୍କ ଲିଷ୍ଟରେ ୧୭ ତମ ସ୍ଥାନରେ ରହିବେ। ସେଭଳି ଦିଲ୍ଲୀର ସବୁଠାରୁ କମ୍ ବୟସ୍କା ମହିଳା ମୁଖ୍ୟମନ୍ତ୍ରୀ ମଧ୍ୟ ହେବେ।
ଏପର୍ଯ୍ୟନ୍ତର ସବୁଠାରୁ କମ୍ ବୟସ୍କା ମହିଳା ମୁଖ୍ୟମନ୍ତ୍ରୀ ରେକର୍ଡ ଶଶିକଳା କାକୋଡରଙ୍କ ନାଁରେ ରହିଛି, ସେ ୩୮ ବର୍ଷ ବୟସରେ ଗୋଆର ପ୍ରଥମ ମହିଳା ମୁଖ୍ୟମନ୍ତ୍ରୀ ହୋଇଥିଲେ। ନନ୍ଦିନୀ ଶତପଥୀ ୪୧ ବର୍ଷ ବୟସରେ ଓଡିଶାର ପ୍ରଥମ ମହିଳା ମୁଖ୍ୟମନ୍ତ୍ରୀ ହୋଇଥିଲେ। ବିଏସ୍ପି ନେତ୍ରୀ କୁମାରୀ ମାୟାବତୀ ୩୯ ବର୍ଷରେ ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ହୋଇଥିଲେ। ମାୟାବତୀଙ୍କ ବ୍ୟତୀତ ସିଏମ୍ ପଦ ସମ୍ଭାଳିଥିବା ଆଉ ଜଣେ ଯୁବ ମହିଳା ମୁଖ୍ୟମନ୍ତ୍ରୀ ହେଉଛନ୍ତି ଆରଜେଡି ନେତା ଲାଲୁ ପ୍ରସାଦ ଯାଦବଙ୍କ ପତ୍ନୀ ରାବ୍ରି ଦେବୀ। ଚାରା ଘୋଟାଲା ଦୁର୍ନୀତିରେ ଲାଲୁ ଦୋଷୀ ସାବ୍ୟସ୍ତ ହେବାପରେ ରାବ୍ରି ଦେବୀ ୧୯୯୭ ରେ ୪୨ ବଷ ବୟସରେ ବିହାରର ମୁଖ୍ୟମନ୍ତ୍ରୀ ହୋଇଥିଲେ। ୨୦୦୫ ପର୍ଯ୍ୟନ୍ତ ଏହି ପଦବୀରେ ଥିଲେ।
ସେଭଳି ୧୯୯୧ ରେ ୪୩ ବର୍ଷରେ ତାମିଲନାଡୁର ସବୁଠାରୁ ଯୁବ ଓ ପ୍ରଥମ ମହିଳା ମୁଖ୍ୟମନ୍ତ୍ରୀ ହୋଇଥିଲେ ଜେ.ଜୟଲଳିତା। ମୁଖ୍ୟମନ୍ତ୍ରୀ ଭାବରେ ତାଙ୍କର କାର୍ଯ୍ୟକାଳ ଖୁବ୍ ବିବାଦୀୟ ଥିଲା। ୨୯ ସେପ୍ଟେମ୍ବର ୨୦୧୪ ରେ ଆୟଠାରୁ ଅଧିକ ସମ୍ପତ୍ତି ମାମଲାରେ ବେଙ୍ଗାଲୁରର ସ୍ବତନ୍ତ୍ର କୋର୍ଟ ଦୋଷୀ ସାବ୍ୟସ୍ତ କରିଥିଲେ।ପଦବୀରେ ଥାଇ ଜୟଲଳିତା ଗିରଫ ହୋଇଥିବା ପ୍ରଥମ ମହିଳା ମୁଖ୍ୟମନ୍ତ୍ରୀ ଥିଲେ। ସେଭଳି ବିଜେପିର ଉମା ଭାରତୀ ୪୪ ବର୍ଷ ବୟସରେ ମଧ୍ୟ ପ୍ରଦେଶର ମୁଖ୍ୟମନ୍ତ୍ରୀ ହୋଇଥିଲେ।
