ଭୁବନେଶ୍ବର: ଭାରତରେ ପ୍ରଥମ ଥର ପାଇଁ ଇଣ୍ଡିଆ ଇଣ୍ଟରନ୍ୟାସନାଲ ଓପନ ତାଇକୋଣ୍ଡୋ ଜାତୀୟ ଚାମ୍ପିଅନସିପ୍ ଆୟୋଜିତ ହେଉଛି। ମହାରାଷ୍ଟ୍ର ପୁଣେସ୍ଥିତ ଶ୍ରୀ ଶିବ ଛତ୍ରପତି ସ୍ପୋର୍ଟ୍ସ କମ୍ପ୍ଲେକ୍ସଠାରେ ଆଜିଠାରୁ ଅର୍ଥାତ୍ ନଭେମ୍ବର ୨୦ ରୁ ୨୬ ତାରିଖ ପର୍ଯ୍ୟନ୍ତ ଏହି ଅନ୍ତର୍ଜାତୀୟ ପ୍ରତିଯୋଗିତା ଅନୁଷ୍ଠିତ ହେବ।
ଏହି ପ୍ରତିଯୋଗିତାରେ ଦେଶର ବିଭିନ୍ନ ରାଜ୍ୟ ସହ ବିଦେଶର ବହୁ ଖେଳାଳି ଅଂଶଗ୍ରହଣ କରିବେ। କ୍ୟୋରୁଗି ଫାଇଟ୍ ଏବଂ ପୁମସେ ବିଭାଗରେ ଏହି ପ୍ରତିଯୋଗିତା ଅନୁଷ୍ଠିତ ହେବାକୁ ଥିବାବେଳେ ସବ୍-ଜୁନିୟର୍, ଜୁନିୟର୍ ଏବଂ ସିନିୟର୍ ବର୍ଗରେ ଖେଳାଳିମାନେ ନିଜର ଦକ୍ଷତା ପ୍ରଦର୍ଶନ କରିବେ।ଭୁବନେଶ୍ବରର ଏମ୍ ଜଗା ରାଓ, ରଜତ ଜଗଦେବ ଓ ବଂଶିକା ମହାପାତ୍ର କ୍ୟୋରୋଗୀ ବିଭାଗରେ ଅଂଶଗ୍ରହଣ କରିବେ ।
ଏହି ସଫଳତା ପଛରେ ଖେଳାଳିମାନଙ୍କର କୋଚ୍, ପିତାମାତା ଏବଂ ଭୁବନେଶ୍ବର ତାଇକୋଣ୍ଡୋ ବହୁତ ବଡ଼ ଅବଦାନ ରହିଛି। ସେମାନଙ୍କ ନିରନ୍ତର ମାର୍ଗଦର୍ଶନ ଏବଂ ଉତ୍ସାହ ଯୋଗୁଁ ଆଜି ଭୁବନେଶ୍ୱରର ଏହି ପ୍ରତିଭାମାନେ ଜାତୀୟ ସ୍ତରରୁ ଅନ୍ତର୍ଜାତୀୟ ମଞ୍ଚକୁ ଯାଉଛନ୍ତି।
ଏହି ସଫଳତା ଭୁବନେଶ୍ୱର ତଥା ଓଡ଼ିଶାର ତାଇକୋଣ୍ଡୋ କ୍ରୀଡ଼ା ପାଇଁ ଏକ ଗର୍ବର ବିଷୟ। ଉଭୟ ଖେଳାଳିଙ୍କ ଏହି ଅଂଶଗ୍ରହଣ ରାଜଧାନୀର ଯୁବପିଢ଼ିଙ୍କୁ କ୍ରୀଡ଼ା କ୍ଷେତ୍ରରେ ଆଗକୁ ବଢ଼ିବା ପାଇଁ ନୂତନ ପ୍ରେରଣା ଯୋଗାଇବ ବୋଲି କ୍ରୀଡ଼ାପ୍ରେମୀମାନେ ଆଶା ପ୍ରକାଶ କରିଛନ୍ତି।
ଅନ୍ୟପଟେ ଭୁବନେଶ୍ବର ତାଇକୋଣ୍ଡୋର ସମ୍ପାଦକ ସନ୍ତୋଷ ମହାନ୍ତି, ଉପ-ସଭାପତି ଅବିନାଶ ସାହୁ, ଯୁଗ୍ମ ସମ୍ପାଦକ ଅଭିଜିତ ସାହୁ ଓ ଏମ ନରସିଂହ ଏହି ପ୍ରତିଯୋଗୀଙ୍କୁ ଶୁଭେଚ୍ଛା ଜଣାଇବା ସହ ଖେଳାଳିମାନଙ୍କ ଉଜ୍ଜ୍ୱଳ ଭବିଷ୍ୟତ ଓ ସଫଳତା କାମନା କରିଛନ୍ତି।



