ଦ୍ରୁତ ଗତିରେ ଦୁର୍ବଳ ହେଉଛି ଅକଭାନ । ଏବେ ଗଭୀର ଅବପାତରେ ପରିଣତ ହୋଇଛି । ପରବର୍ତ୍ତୀ ୬ ଘଣ୍ଟାରେ ଅବପାତରେ ପରିଣତ ହେବ । ଏହା ପରେ ସୁଦୃଶ୍ୟ ଲଘୁଚାପରେ ପରିଣତ ହେବ ଅକଭାନ । ସ୍ଥଳଭାଗ ଛୁଇଁବା ପରେ ଦ୍ରୁତ ଭାବେ ଦୁର୍ବଳ ହେଉଛି ଅକଭାନ । ଘଣ୍ଟା ପ୍ରତି ୨୬ କିଲୋମିଟର ବେଗରେ ଉତ୍ତର-ଉତ୍ତରପଶ୍ଚିମ ଦିଗକୁ ଗତି କରୁଛି ।
ସକାଳ ୭ଟା୩୦ ରୁ ୮ଟା ୩୦ ମଧ୍ୟରେ ଲ୍ୟାଣ୍ଡଫଲ୍ ପ୍ରକ୍ରିୟା ଶେଷ ହୋଇଥିଲା । ଉତ୍ତର ଆନ୍ଧ୍ରପ୍ରଦେଶ ଓ ଦକ୍ଷିଣ ଓଡ଼ିଶା ଉପକୂଳର ଗୋପାଳପୁର ନିକଟରେ ସ୍ଥଳଭାଗ ଅତିକ୍ରମ କରିଛି ଅକଭାନ । ଲ୍ୟାଣ୍ଡଫଲ ସମୟରେ ପବନର ବେଗ ଘଣ୍ଟା ପ୍ରତି ୭୦-୮୦ କିଲୋମିଟର ଥିଲା । ଘଣ୍ଟାପ୍ରତି ୯୦ କି.ମି. ଥିଲା ଝଟକା ପବନର ବେଗ । ତେବେ ଅକଭାନ ପ୍ରଭାବରେ ବିଭିନ୍ନ ସ୍ଥାନରେ କିନ୍ତୁ ଜାରି ରହିଛି ବର୍ଷା । ତଳିଆ ଅଞ୍ଚଳ ଲୋକଙ୍କୁ ବାତ୍ୟା ଆଶ୍ରୟ ସ୍ଥଳକୁ ସ୍ଥାନାନ୍ତର କରିଛି ପ୍ରସାଶନ ।
କଟକରେ ଗତକାଲି ଠାରୁ ଲାଗିରହିଛି ବର୍ଷା:
ଏପଟେ, ବାତ୍ୟା ଅକଭାନ ପ୍ରଭାବରେ କଟକରେ ଗତକାଲି ଠାରୁ ଲାଗିରହିଛି ବର୍ଷା । ଏହାକୁ ଦୃଷ୍ଟିରେ ରଖି କଟକ ମହା ନଗରନିଗମ ବ୍ୟାପକ ବ୍ୟବସ୍ତା କରିଛି । ତଳିଆ ଅଞ୍ଚଳ ଲୋକଙ୍କୁ ବାତ୍ୟା ଆଶ୍ରୟ ସ୍ଥଳକୁ ସ୍ଥାନାନ୍ତର କରିଛି ଜିଲ୍ଲା ପ୍ରସାଶନ । ଏହା ସହ ତଳିଆ ଅଞ୍ଚଳରେ ଯେମିତି ଜଳ ବନ୍ଦୀ ସମସ୍ୟା ନ ଉପୁଜେ ତାଉପରେ ଫୋକସ ରଖିଛି ମହାନଗର ନିଗମ । ୩୦୦ ରୁ ଉର୍ଦ୍ଧ ପମ୍ପ ସେଟ ବିଭିନ୍ନ ଜାଗାରେ ଲାଗିଛି । ସମସ୍ତ ଅଧିକାରୀ ସଜାଜ ଅଛନ୍ତି । ବିଶେଷ ଭାବେ ନଦୀ କୂଳକୁ ନ ଯିବା ପାଇଁ ଲୋକଙ୍କୁ ମନା କରାଯାଇଛି ।
ସେହିପରି ଜିଲ୍ଲାର ବାଙ୍କୀ ଉପଖଣ୍ଡରେ ବାତ୍ୟା ଅକ୍ୱାନ ପ୍ରଭାଵରେ ଗତକାଲି ରାତିରୁ ବର୍ଷା ଲାଗି ରହିଥିବା ବେଳେ ବାତ୍ୟା ଆଜି ଲ୍ୟାଣ୍ଡଫଲ କରିବା ପରେ ପ୍ରବଳ ବର୍ଷା ଓ ପବନ ବହିବାର ଆଶଙ୍କା ଥିବାରୁ ବାଙ୍କୀ ଡମପଡ଼ା ବ୍ଲକ୍ ପ୍ରଶାସନ ଚନ୍ଦକା ଡମପଡ଼ା ଅଭୟାରଣ୍ୟରେ ରହୁଥିବା ପାଞ୍ଚ ଗୋଟି ଗ୍ରାମର ଲୋକଙ୍କୁ ଗତକାଲି ଠାରୁ ସ୍ଥାନାନ୍ତରିତ କରି ଡମପଡ଼ା ପ୍ରୀତମ କୁମାରୀ ହାଇ ସ୍କୁଲରେ ରଖିଛି । ସମସ୍ତ ପରିବାର ଏହି ସ୍କୁଲରେ ଅଛନ୍ତି । ସମସ୍ତ ଙ୍କୁ ଖାଦ୍ୟ ପେୟର ବ୍ୟବସ୍ଥା କରାଯାଇଛି। ପ୍ରସୂତି ମହିଳାଙ୍କୁ ଚିକିତ୍ସା କରିବା ପାଇଁ ଡାକ୍ତର ପହଞ୍ଚି ସ୍ବାସ୍ଥ୍ୟ ଅବସ୍ଥା ଦେଖୁଛନ୍ତି । ପ୍ରାଥମିକ ଚିକିତ୍ସା ପାଇଁ ଆବଶ୍ୟକୀୟ ଔଷଧ ରଖା ଯାଇଛି ।
ପୋଲସରାରେ ବିଭିନ୍ନ ସ୍ଥାନରେ ଝିପି ଝିପି ବର୍ଷା:
ଏପଟେ ବାତ୍ୟା ଅକଭାନ ପ୍ରଭାବରେ ଗଞ୍ଜାମ ପୋଲସରାରେ ପ୍ରଭାବ ଦେଖିବାକୁ ମିଳିଛି । ବିଭିନ୍ନ ସ୍ଥାନରେ ଝିପି ଝିପି ବର୍ଷା ଜାରି ରହିଛି । ବର୍ଷା ଯୋଗୁ ଧନେଇ ନଦୀର ଜଳସ୍ତର ବଢ଼ିଛି । ପାଣ୍ଡିରିପଡା ପଞ୍ଚାୟତର ପାତାଳସିଂ ନିକଟରେ ଧନେଇ ନଦୀ ପୋଲରେ ଦୁଇ ଫୁଟ ଉଚ୍ଚରେ ବନ୍ୟାଜଳ ପ୍ରବାହିତ ହେଉଛି । ଯାହା ଫଳରେ ପାଣ୍ଡିରିପଡା-ଗୋଛାବାଡି ଯୋଗାଯୋଗ ବିଛିନ୍ନ ହୋଇପଡ଼ିଛି । ଅନ୍ୟ ପକ୍ଷରେ ଧନେଇ ନଦୀରେ ଜଳସ୍ତର ବଢିବାରୁ ସ୍ୱୟଂ ଚାଳିତ ଗେଟ ଦେଇ ବନ୍ୟାଜଳ ନିଷ୍କାସିତ ହେଉଛି। ପ୍ରଶାସନ ପକ୍ଷରୁ ସମସ୍ତ ଘଟଣା ଉପରେ ସତର୍କ ଦୃଷ୍ଟି ରଖାଯାଇଛି । ନଦୀ ଅବବାହିକାରେ ଲୋକଙ୍କୁ ସତର୍କ ରହିବାକୁ କୁହାଯାଇଛି ।
ଗଞ୍ଜାମ ଜିଲ୍ଲା ହିଞ୍ଜିଳିକାଟୁରେ ଲଗାତାର ବର୍ଷା:
ଗଞ୍ଜାମ ଜିଲ୍ଲା ହିଞ୍ଜିଳିକାଟୁରେ ଲଗାତାର ବର୍ଷା ଯୋଗୁଁ ଘୋଡ଼ାହାଡ଼ ବ୍ରିଜ୍ ନିକଟରେ ଥିବା ଜଳସେଚନ ବିଭାଗ ରାସ୍ତା ଭାଙ୍ଗି ଘାଇ ସୃଷ୍ଟି ହୋଇଛି । ଆଜି ହାଲକା ବର୍ଷା ହେଉଥିବା ବେଳେ ଧୀରେ ଧୀରେ ପାଗ ସ୍ୱାଭାବିକ ହେବାରେ ଲାଗିଛି । ଆଜି ମଧ୍ୟ ଲୋକଙ୍କୁ ବାତ୍ୟା ଆଶ୍ରୟସ୍ଥଳୀରେ ରଖାଯିବ । ଏଥିସହ ଟାଉନ୍ ରେ ଲାଗିଥିବା ବଡ଼,ବଡ଼ ଲାଇଟ୍ ତଳକୁ ଓହ୍ଲାଇ ଦିଆଯାଇଛି । ଅନ୍ୟପଟେ ବିପଦ ପୂର୍ଣ୍ଣ ଅଞ୍ଚଳକୁ ପ୍ରଶାସନିକ ଅଧିକାରୀ ମାନେ ବୁଲି ସ୍ଥିତି ସମୀକ୍ଷା କରିଛନ୍ତି ।
ବାତ୍ୟାର ପ୍ରଭାବରେ ବ୍ରହ୍ମପୁର ସହରରେ ଗତକାଲିଠାରୁ ଲାଗି ରହିଛି ଲଗାଣ ବର୍ଷା
ବାତ୍ୟାର ପ୍ରଭାବରେ ବ୍ରହ୍ମପୁର ସହରରେ ଗତକାଲିଠାରୁ ଲାଗି ରହିଛି ଲଗାଣ ବର୍ଷା । ରାତିତମାମ ବର୍ଷା ଯୋଗୁଁ ସହରର ବିଭିନ୍ନ ତଳିଆ ଅଞ୍ଚଳରେ ଜମି ରହିଛି ବର୍ଷାଜଳ । ଫଳରେ ଜଳମଗ୍ନ ହୋଇପଡ଼ିଛି ଅନେକ ଅଞ୍ଚଳ । ଏହାକୁ ଦୃଷ୍ଟିରେ ରଖି ଜଳବନ୍ଦୀ ସମସ୍ୟାର ମୁକାବିଲା ପାଇଁ ଅଗ୍ନିଶମ ବିଭାଗ ପକ୍ଷରୁ ଜୋରଦାର ଉଦ୍ୟମ ଜାରି ରହିଛି ।
ବିଭିନ୍ନ ସ୍ଥାନରେ ପମ୍ପ ମାଧ୍ୟମରେ ଜମି ରହିଥିବା ବର୍ଷାଜଳ ନିଷ୍କାସନ କରାଯାଉଛି । ବିଶେଷ କରି ଗଜପତି ନଗର, ନିଳାଞ୍ଚଳ ନଗର ଓ ଜୟପ୍ରକାଶ ନଗର ଅଞ୍ଚଳ ଜଳମଗ୍ନ ହୋଇଥିବା ବେଳେ ଲୋକଙ୍କ ଘରେ ପାଣି ପଶିବାରୁ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି । ସହରର ବାବା ନୀଳକଣ୍ଠେଶ୍ଵର ମନ୍ଦିର ପରିସରରେ ପଶି ଯାଇଛି ପାଣି । ମନ୍ଦିର ଭିତରେ ବର୍ଷା ପାଣିରେ ଠାକୁର ବୁଡ଼ିଯାଇଛନ୍ତି ।



