ଗାଡ଼ି ବୀମା କିଣୁଥିବା ଗ୍ରାହକଙ୍କ ପାଇଁ ବଡ଼ ଖବର । ଏଣିକି ବଦଳିବ ମୋଟର ଇନ୍ସୁରାନ୍ସ ପଲିସିର ଢାଞ୍ଚା । ଥାର୍ଡ ପାର୍ଟି ଏବଂ କମ୍ପ୍ରିହେନ୍ସିଭ୍ ପଲିସି ବଦଳରେ ଆସିବ ଚାରିଟି ସେକ୍ସନରେ ବିଭକ୍ତ ନୂଆ ପଲିସି । ନିଜ ଆବଶ୍ୟକତା ଅନୁସାରେ କଭର୍ ବାଛିପାରିବେ ଗ୍ରାହକ । ପ୍ରତ୍ୟେକ କଭର୍ ପାଇଁ ଦେବାକୁ ପଡ଼ିବ ଅଲଗା ପ୍ରିମିୟମ୍ । ୧୫ ଡିସେମ୍ବର ୨୦୨୬ରୁ ଲାଗୁ ହେବ ଏହି ନୂଆ ବ୍ୟବସ୍ଥା । ତେବେ କ’ଣ ରହିଛି ନୂଆ ନିୟମରେ, ଆସନ୍ତୁ ଜାଣିବା ।
ମୋଟର ଯାନ ବୀମା କ୍ଷେତ୍ରରେ ବଡ଼ ପରିବର୍ତ୍ତନ । ଭାରତୀୟ ବୀମା ନିୟାମକ ଓ ବିକାଶ ପ୍ରାଧିକରଣ IRDAI ଆଣିଛି ନୂଆ ନିୟମ । ଡିସେମ୍ବର ୧୫, ୨୦୨୬ରୁ ଜାରି ହେଉଥିବା ଘରୋଇ କାର୍ ଏବଂ ଦୁଇଚକିଆ ଯାନର ପଲିସିରେ ରହିବ ଚାରୋଟି ଭିନ୍ନ ସେକ୍ସନ୍ । ପ୍ରଥମ ସେକ୍ସନରେ ରହିବ ଥାର୍ଡ ପାର୍ଟି କଭର୍ । ଅର୍ଥାତ୍ ଆପଣଙ୍କ ଗାଡ଼ି ଦ୍ୱାରା ଅନ୍ୟ କାହାରି ମୃତ୍ୟୁ, ଆଘାତ କିମ୍ବା ସମ୍ପତ୍ତିର କ୍ଷତି ହେଲେ ମିଳିବ ବୀମା ସୁରକ୍ଷା ।
ଦ୍ୱିତୀୟ ସେକ୍ସନରେ ରହିବ ଗାଡ଼ିରେ ବସିଥିବା ଯାତ୍ରୀଙ୍କ ପ୍ରତି ଆପଣଙ୍କ ଆଇନଗତ ଦାୟିତ୍ୱର କଭର୍ । ତୃତୀୟ ସେକ୍ସନରେ ରହିବ ପର୍ସନାଲ୍ ଆକ୍ସିଡେଣ୍ଟ କଭର୍ । ଏହା ଗାଡ଼ି ମାଲିକଙ୍କ ସହ ଇଚ୍ଛାଧୀନ ଭାବେ ଯାତ୍ରୀଙ୍କ ପାଇଁ ମଧ୍ୟ ନିଆଯାଇପାରିବ । ଚତୁର୍ଥ ସେକ୍ସନରେ ରହିବ ଓନ୍ ଡ୍ୟାମେଜ୍ କଭର୍ । ଅର୍ଥାତ୍ ନିଜ ଗାଡ଼ିର କ୍ଷତି ପାଇଁ ବୀମା ସୁରକ୍ଷା ।
ତେବେ ଏହି ନିୟମ ପଛରେ ରହିଛି ସୁପ୍ରିମକୋର୍ଟଙ୍କ ଏକ ଗୁରୁତ୍ୱପୂର୍ଣ୍ଣ ରାୟ । ନ୍ୟାସନାଲ୍ ଇନ୍ସୁରାନ୍ସ ବନାମ ଥୁଙ୍ଗଲା ଧନଲକ୍ଷ୍ମୀ ମାମଲାରେ ୪ ଅଗଷ୍ଟ ୨୦୨୬ରେ ସୁପ୍ରିମକୋର୍ଟ ବୀମା କମ୍ପାନୀର ଆବେଦନ ଖାରଜ କରିଥିଲେ । ମାମଲା ଅନୁସାରେ, ଟି. ରାମୁ ନାମକ ଜଣେ କାର୍ ମାଲିକ ନିଜ କାରରେ ଯାତ୍ରୀ ଭାବେ ଯାଉଥିବା ସମୟରେ ଏକ ଅଜଣା ଗାଡି ଧକ୍କା ଦେଇ ଫେରାର ହୋଇଯାଇଥିଲା । ଏଥିରେ ତାଙ୍କ ମୃତ୍ୟୁ ହୋଇଥିଲା । କାରର କମ୍ପ୍ରିହେନ୍ସିଭ୍ ପଲିସି ଥିବା ସତ୍ତ୍ୱେ ବୀମା କମ୍ପାନୀ କ୍ଷତିପୂରଣ ଦେବାକୁ ମନା କରିଥିଲା ।
କିନ୍ତୁ ମାମଲାରେ ପରିବାର ପକ୍ଷରେ ରାୟ ଆସିଥିଲା । ୨୦୦୯ର IRDAI ସର୍କୁଲାରକୁ ଆଧାର କରି ସୁପ୍ରିମକୋର୍ଟ ବୀମା କମ୍ପାନୀର ଯୁକ୍ତିକୁ ଗ୍ରହଣ କରିନଥିଲେ । ଏହା ପରେ ବୀମା ପଲିସିରେ କେଉଁ କଭର୍ ରହିଛି ଏବଂ କେଉଁଥିପାଇଁ କେତେ ପ୍ରିମିୟମ୍ ଦେବାକୁ ପଡ଼ୁଛି, ତାହା ସ୍ପଷ୍ଟ କରିବା ଉପରେ ଗୁରୁତ୍ୱ ଦିଆଯାଇଛି । ନୂଆ ବ୍ୟବସ୍ଥାରେ ଥାର୍ଡ ପାର୍ଟି କଭର୍ ଏବଂ ଗାଡ଼ି ମାଲିକଙ୍କ ପର୍ସନାଲ୍ ଆକ୍ସିଡେଣ୍ଟ କଭର୍ ବାଧ୍ୟତାମୂଳକ ରହିବ । ଅନ୍ୟ କଭରଗୁଡ଼ିକୁ ଗ୍ରାହକ ନିଜ ଆବଶ୍ୟକତା ଅନୁସାରେ ବାଛିପାରିବେ ।
ଏଥିପାଇଁ ଏକ ଅପ୍ସନ୍ ଫର୍ମ ପୂରଣ କରି ପ୍ରତ୍ୟେକ ସେକ୍ସନରେ ଅପ୍ଟ ଇନ୍ କିମ୍ବା ଅପ୍ଟ ଆଉଟ୍ କରିବାକୁ ପଡ଼ିବ। ଅନଲାଇନରେ ପଲିସି କିଣିଲେ OTP ମାଧ୍ୟମରେ ମଧ୍ୟ ସମ୍ମତି ଦେଇହେବ । ସବୁଠାରୁ ବଡ଼ କଥା ହେଉଛି, ପଲିସିରେ ପ୍ରତ୍ୟେକ ସେକ୍ସନର ପ୍ରିମିୟମ୍ ଅଲଗା ଭାବେ ଦର୍ଶାଯିବ । ଫଳରେ କେଉଁ ସୁବିଧା ପାଇଁ ଗ୍ରାହକ କେତେ ଟଙ୍କା ଦେଉଛନ୍ତି, ତାହା ଜାଣିବା ସହଜ ହେବ ।
ତେବେ ଏହି ନୂଆ ବ୍ୟବସ୍ଥା ଯୋଗୁଁ ମୋଟ ପ୍ରିମିୟମ୍ କମିବ ବୋଲି କୌଣସି ନିଶ୍ଚିତତା ନାହିଁ । କାରଣ ନୂଆ କଭର୍ ଯୋଡ଼ାଯାଉନାହିଁ, ବରଂ ପୂର୍ବରୁ ଥିବା କଭରଗୁଡ଼ିକୁ ଅଲଗା ଅଲଗା ଭାବେ ଦର୍ଶାଯାଉଛି । ତେଣୁ ନୂଆ ମୋଟର ବୀମା ପଲିସି କିଣିବା ସମୟରେ କେବଳ ପ୍ରିମିୟମ୍ ନୁହେଁ, ବରଂ ପ୍ରତ୍ୟେକ ସେକ୍ସନରେ କେଉଁ ସୁବିଧା ମିଳୁଛି, ତାହା ଭଲ ଭାବେ ଯାଞ୍ଚ କରନ୍ତୁ । କାରଣ ସଠିକ୍ ବୀମା କଭର୍ ହିଁ ଆପଣଙ୍କୁ ଅସୁବିଧା ସମୟରେ ଆର୍ଥିକ ସୁରକ୍ଷା ଦେଇପାରିବ ।



