ଆଜି ପବିତ୍ର ଛଟ୍ ପୂଜା । ସୂର୍ଯ୍ୟ ଉପାସନାର ପବିତ୍ର ପର୍ବ । ଆଜି ମହାଆଡ଼ମ୍ବରରେ ପାଳନ କରାଯାଉଛି ପବିତ୍ର ଛଟ୍ ପୂଜା । ବିଶେଷକରି ବିହାର, ଝାଡ଼ଖଣ୍ଡ, ପୂର୍ବ ଉତ୍ତରପ୍ରଦେଶ ସମେତ ଦେଶର ବିଭିନ୍ନ ସ୍ଥାନରେ ଏହି ପର୍ବକୁ ନେଇ ଉତ୍ସବମୁଖର ପରିବେଶ । ନଦୀ, ପୋଖରୀ ଓ ବିଭିନ୍ନ ଜଳାଶୟ କୂଳରେ ଶ୍ରଦ୍ଧାଳୁମାନେ ଏକାଠି ହୋଇ ସୂର୍ଯ୍ୟଦେବ ଓ ଛଟ୍ ମାଆଙ୍କ ଆରାଧନା କରୁଛନ୍ତି । ପରିବାରର ସୁଖଶାନ୍ତି, ସମୃଦ୍ଧି, ସୁସ୍ଥ ଜୀବନ ଏବଂ ସନ୍ତାନଙ୍କ ମଙ୍ଗଳ କାମନା କରି ଏହି ପୂଜା କରାଯାଇଥାଏ ।
ହିନ୍ଦୁ ଧାର୍ମିକ ପରମ୍ପରାରେ ଛଟ୍ ପୂଜାର ସ୍ୱତନ୍ତ୍ର ମହତ୍ତ୍ୱ ରହିଛି । ଏହା ମୁଖ୍ୟତଃ ସୂର୍ଯ୍ୟଦେବ ଓ ଛଟ୍ ମାଆଙ୍କ ଉପାସନାର ପର୍ବ। ସୂର୍ଯ୍ୟଙ୍କୁ ଜୀବନ, ଶକ୍ତି ଓ ସମୃଦ୍ଧିର ଉତ୍ସ ଭାବେ ବିବେଚନା କରାଯାଏ । ତେଣୁ ଏହି ପର୍ବରେ ଅସ୍ତଗାମୀ ଓ ଉଦୟଗାମୀ ସୂର୍ଯ୍ୟଙ୍କୁ ଅର୍ଘ୍ୟ ପ୍ରଦାନ କରିବାର ବିଶେଷ ପରମ୍ପରା ରହିଛି । ଛଟ୍ ପୂଜା ଚାରିଦିନ ଧରି ପାଳନ କରାଯାଏ । ପ୍ରଥମ ଦିନକୁ ‘ନହାୟ ଖାୟ’, ଦ୍ୱିତୀୟ ଦିନକୁ ‘ଖରନା’, ତୃତୀୟ ଦିନକୁ ‘ସନ୍ଧ୍ୟା ଅର୍ଘ୍ୟ’ ଏବଂ ଚତୁର୍ଥ ଦିନକୁ ‘ଉଷା ଅର୍ଘ୍ୟ’ କୁହାଯାଏ ।
ଏହି ସମୟରେ ବ୍ରତଧାରୀମାନେ କଠୋର ନିୟମ ପାଳନ କରିଥାନ୍ତି । ବିଶେଷକରି ଖରନା ପରେ ପ୍ରାୟ ୩୬ ଘଣ୍ଟା ଧରି ନିର୍ଜଳା ଉପବାସ ରଖିବାର ପରମ୍ପରା ରହିଛି । ଛଟ୍ ପୂଜାର ଆଉ ଏକ ବିଶେଷତ୍ୱ ହେଉଛି ପ୍ରକୃତି ପ୍ରତି କୃତଜ୍ଞତା । ଏହି ପୂଜାରେ ବାଉଁଶ ଡାଲା, ଫଳମୂଳ, ଆଖୁ, ନଡ଼ିଆ ଓ ପାରମ୍ପରିକ ଠେକୁଆ ଭୋଗ ଅର୍ପଣ କରାଯାଏ ।
ଏହି ପର୍ବ ପବିତ୍ରତା, ଆତ୍ମସଂଯମ, ଶୃଙ୍ଖଳା ଓ ପାରିବାରିକ ଏକତାର ବାର୍ତ୍ତା ଦେଇଥାଏ । ଧାର୍ମିକ ବିଶ୍ୱାସ ଅନୁସାରେ ନିଷ୍ଠାର ସହ ଛଟ୍ ବ୍ରତ ପାଳନ କଲେ ପରିବାରରେ ସୁଖଶାନ୍ତି ବଜାୟ ରହିବା ସହ ସନ୍ତାନଙ୍କ ମଙ୍ଗଳ ହୋଇଥାଏ । ଏହି ପର୍ବରେ ଜାତି, ବର୍ଗ ଓ ଆର୍ଥିକ ସ୍ଥିତି ନିର୍ବିଶେଷରେ ଲୋକମାନେ ଏକାଠି ହୋଇ ପୂଜାର୍ଚ୍ଚନା କରିଥାନ୍ତି । ଏହା ଭକ୍ତି ସହ ସାମାଜିକ ଏକତାର ମଧ୍ୟ ଏକ ଅନନ୍ୟ ଉଦାହରଣ ।
