ଆଜି ନଭେମ୍ବର ୧୪, ସାରା ଦେଶରେ ପାଳନ ହେଉଛି ଶିଶୁ ଦିବସ । ପିଲାମାନଙ୍କ ହସ, ଖୁସି ଓ ଉତ୍ସାହରେ ଆଜି ମୁଖରିତ ହୋଇଉଠିଛି ବିଭିନ୍ନ ବିଦ୍ୟାଳୟ ଓ ଶିକ୍ଷାନୁଷ୍ଠାନ । ଏହି ଦିନଟି କେବଳ ଉତ୍ସବ ପାଳନର ଦିନ ନୁହେଁ, ବରଂ ଶିଶୁମାନଙ୍କ ଅଧିକାର, ଶିକ୍ଷା, ସୁରକ୍ଷା ଓ ଉଜ୍ଜ୍ୱଳ ଭବିଷ୍ୟତ ପ୍ରତି ସମାଜକୁ ସଚେତନ କରିବାର ଏକ ବିଶେଷ ଅବସର ।
ଦେଶର ପ୍ରଥମ ପ୍ରଧାନମନ୍ତ୍ରୀ ପଣ୍ଡିତ ଜବାହାରଲାଲ ନେହେରୁଙ୍କ ଜନ୍ମଜୟନ୍ତୀ ଅବସରରେ ପ୍ରତିବର୍ଷ ନଭେମ୍ବର ୧୪ ତାରିଖକୁ ଶିଶୁ ଦିବସ ଭାବେ ପାଳନ କରାଯାଏ। ୧୮୮୯ ମସିହା ନଭେମ୍ବର ୧୪ରେ ଆହ୍ଲାବାଦରେ ଜନ୍ମଗ୍ରହଣ କରିଥିଲେ ନେହେରୁ। ସେ ଭାରତର ସ୍ୱାଧୀନତା ସଂଗ୍ରାମରେ ସକ୍ରିୟ ଭୂମିକା ନେବା ସହ ସ୍ୱାଧୀନ ଭାରତର ପ୍ରଥମ ପ୍ରଧାନମନ୍ତ୍ରୀ ହୋଇଥିଲେ ।
ନେହେରୁ ପିଲାମାନଙ୍କୁ ଖୁବ୍ ଭଲ ପାଉଥିଲେ । ସେମାନଙ୍କ ସହ ସମୟ ବିତାଇବା ଏବଂ ସେମାନଙ୍କ ମନର କଥା ଶୁଣିବାକୁ ସେ ବେଶ୍ ପସନ୍ଦ କରୁଥିଲେ । ତାଙ୍କର ଏହି ଶିଶୁପ୍ରେମ ପାଇଁ ପିଲାମାନେ ତାଙ୍କୁ ସ୍ନେହରେ ‘ଚାଚା ନେହେରୁ’ ବୋଲି ଡାକୁଥିଲେ। ତାଙ୍କ ମତରେ ଶିଶୁମାନେ ହେଉଛନ୍ତି ଦେଶର ପ୍ରକୃତ ଭବିଷ୍ୟତ । ସେମାନଙ୍କୁ ଉପଯୁକ୍ତ ଶିକ୍ଷା, ସଂସ୍କାର ଓ ସୁଯୋଗ ମିଳିଲେ ହିଁ ଦେଶର ଭବିଷ୍ୟତ ଉଜ୍ଜ୍ୱଳ ହୋଇପାରିବ ।
୧୯୬୪ ମସିହାରେ ଜବାହାରଲାଲ ନେହେରୁଙ୍କ ଦେହାନ୍ତ ପରେ ତାଙ୍କ ଜନ୍ମଦିନକୁ ଭାରତରେ ଶିଶୁ ଦିବସ ଭାବେ ପାଳନ କରିବାର ନିଷ୍ପତ୍ତି ନିଆଗଲା । ସେବେଠାରୁ ପ୍ରତିବର୍ଷ ନଭେମ୍ବର ୧୪ରେ ଏହି ଦିବସ ପାଳିତ ହୋଇଆସୁଛି । ଏହି ଅବସରରେ ବିଭିନ୍ନ ସ୍କୁଲ୍ରେ ଚିତ୍ରାଙ୍କନ, ନୃତ୍ୟ, ସଙ୍ଗୀତ, ଖେଳକୁଦ, ଭାଷଣ ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଏ ।
ଶିକ୍ଷକମାନେ ପିଲାମାନଙ୍କୁ ଉପହାର ଦେବା ସହ ସେମାନଙ୍କ ମଧ୍ୟରେ ମିଠା ବଣ୍ଟନ କରିଥାନ୍ତି । ଅନେକ ସ୍ଥାନରେ ଶିଶୁମାନଙ୍କ ପ୍ରତିଭାକୁ ସମ୍ମାନିତ କରାଯାଏ । ତେବେ ଶିଶୁ ଦିବସର ପ୍ରକୃତ ମହତ୍ତ୍ୱ କେବଳ ଗୋଟିଏ ଦିନର ଉତ୍ସବରେ ସୀମିତ ନୁହେଁ ।
ପ୍ରତ୍ୟେକ ଶିଶୁକୁ ଶିକ୍ଷା, ସ୍ୱାସ୍ଥ୍ୟ, ସୁରକ୍ଷା ଓ ସମାନ ସୁଯୋଗ ଯୋଗାଇଦେବା ଆମ ସମସ୍ତଙ୍କ ଦାୟିତ୍ୱ। ପିଲାମାନଙ୍କ ସ୍ୱପ୍ନକୁ ପରିଚୟ ଦେବା ସହ ସେମାନଙ୍କ ପ୍ରତିଭାର ବିକାଶ ପାଇଁ ସୁଯୋଗ ସୃଷ୍ଟି କରିବା ହିଁ ଏହି ଦିବସର ମୂଳ ଉଦ୍ଦେଶ୍ୟ । ଆସନ୍ତୁ, ଏହି ଶିଶୁ ଦିବସରେ ପ୍ରତ୍ୟେକ ଶିଶୁର ମୁହଁରେ ହସ ଫୁଟାଇବା ସହ ସେମାନଙ୍କ ପାଇଁ ଏକ ସୁରକ୍ଷିତ, ଶିକ୍ଷିତ ଓ ସୁନ୍ଦର ଭବିଷ୍ୟତ ଗଢ଼ିବାର ସଂକଳ୍ପ ନେବା।
