ଦୀର୍ଘଦିନ ହେବ ପାରିବାରିକ ବିବାଦକୁ ନେଇ ଚର୍ଚ୍ଚାରେ ରହିଛନ୍ତି ଭୋଜପୁରୀ ଫିଲ୍ମ ଜଗତର ପାଓ୍ବାର ଷ୍ଟାର ଭାବେ ଜଣାଶୁଣା ପଓ୍ବନ ସିଂହ । ପତ୍ନୀ ଜ୍ୟୋତି ତାଙ୍କ ବିପକ୍ଷରେ ଆଣିଥିବା ସାଙ୍ଘାତିକ ଅଭିଯୋଗକୁ ଗଣମାଧ୍ୟମରେ ଖବରର ଶିରୋନାମା ପାଲଟିଛନ୍ତି । ତେବେ ଏହାରି ଭିତରେ ଜ୍ୟୋତି ସୋସିଆଲ ମିଡିଆରେ ଲାଇଭ୍ ଆସି ନୁଜର ଦୁଃଖ ବଖାଣିଛନ୍ତି । ଏହାସହ ନ୍ୟାୟ ବ୍ୟବସ୍ଥା ଉପରେ ଉଠାଇଛନ୍ତି ପ୍ରଶ୍ନ । କୋର୍ଟ କଚେରୀ ଦୌଡ଼ି ଦୌଡ଼ି ହତାଶ ହୋଇ ପଡ଼ିଥିବା ଜ୍ୟୋତି ଲାଇଭ୍ ଭିଡିଓରେ ବଖାଥିବା ଦୁଃଖ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ଯାହାକୁ ନେଇ ୟୁଜର୍ସମାନେ ବିଭିନ୍ନ କମେଣ୍ଟମାନ ଦେଉଥିବା ଦେଖିବାକୁ ମିଳିଛି ।
ସୋସିଆଲ ମିଡିଆରେ ଭାଇରାଲ ହେଉଥିବା ଏହି ଭିଡିଓରେ ଜ୍ୟୋତି ସିଂହ ବେଶ୍ ଭାବବିହ୍ୱଳ ହୋଇପଡ଼ିଥିବା ଦେଖିବାକୁ ମିଳିଛି। ସେ କହିଛନ୍ତି ଯେ, କିଛି ବର୍ଷ ଧରି ସେ ନ୍ୟାୟ ପାଇବା ପାଇଁ ଲଢ଼େଇ କରୁଛନ୍ତି, କିନ୍ତୁ ତାରିଖ ପରେ ତାରିଖ ଗଡ଼ିଚାଲିଛି ସିନା କୌଣସି ସମାଧାନ ବାହାରି ପାରୁନାହିଁ। ପୱନ ସିଂହଙ୍କୁ ଟାର୍ଗେଟ କରି ଜ୍ୟୋତି ପ୍ରଶ୍ନ କରିଛନ୍ତି ଯେ, “ସେ କ’ଣ ଆଇନଠାରୁ ବି ଊର୍ଦ୍ଧ୍ୱରେ? ଜଣେ ବଡ଼ ସେଲିବ୍ରିଟି ହୋଇଥିବାରୁ ତାଙ୍କ ପାଇଁ କ’ଣ କୌଣସି ନିୟମ ଲାଗୁ ହେଉନାହିଁ?”
Related posts
ଜ୍ୟୋତିଙ୍କ ଅଭିଯୋଗ ଅନୁଯାୟୀ, କୋର୍ଟଙ୍କ ପକ୍ଷରୁ ବାରମ୍ବାର ସମନ ଜାରି କରାଯିବା ସତ୍ତ୍ୱେ ପୱନ ସିଂହ ଶୁଣାଣି ସମୟରେ ହାଜର ହେଉନାହାନ୍ତି। ଫଳରେ ମାମଲାଟି ଦୀର୍ଘଦିନ ଧରି ଗଡ଼ି ଚାଲିଛି ।ଏହାସହ ସେ କହିଛନ୍ତି କି, ଏହି ଆଇନଗତ ଲଢ଼େଇରେ ମୁଁ ମାନସିକ ସ୍ତରରେ ସମ୍ପୂର୍ଣ୍ଣ ଭାଙ୍ଗି ପଡ଼ିଛି । ମୁଁ ଜଣେ ସାଧାରଣ ଝିଅ ହୋଇଥିବାରୁ ମୋତେ ନ୍ୟାୟ ମିଳିବାରେ ବିଳମ୍ବ ହେଉଛି । ଜ୍ୟୋତି ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ସେ ନିଜ ସଂସାର ବଞ୍ଚାଇବା ପାଇଁ ଶେଷ ପର୍ଯ୍ୟନ୍ତ ଚେଷ୍ଟା କରିଥିଲେ, କିନ୍ତୁ ପୱନ ସିଂହଙ୍କ ତରଫରୁ କୌଣସି ସକାରାତ୍ମକ ପ୍ରତିକ୍ରିୟା ମିଳିନଥିଲା।
ସେପଟେ ଜ୍ୟୋତି ସିଂହଙ୍କ ଏହି ଭାବପ୍ରବଣ ଭିଡିଓ ସାମ୍ନାକୁ ଆସିବା ପରେ ଭୋଜପୁରୀ ଇଣ୍ଡଷ୍ଟ୍ରି ଏବଂ ସୋସିଆଲ ମିଡିଆରେ ହଇଚଇ ସୃଷ୍ଟି ହୋଇଛି। ଅନେକ ୟୁଜର୍ସ ଜ୍ୟୋତିଙ୍କୁ ସମର୍ଥନ ଜଣାଇବା ସହ ତାଙ୍କୁ ଶୀଘ୍ର ନ୍ୟାୟ ମିଳିବା ଉଚିତ ବୋଲି ଦାବି କରିଛନ୍ତି। ଅନ୍ୟପଟେ ପୱନ ସିଂହଙ୍କ ପକ୍ଷରୁ ଏପର୍ଯ୍ୟନ୍ତ ଏହି ମାମଲାରେ କୌଣସି ପ୍ରତିକ୍ରିୟା ମିଳିପାରି ନାହିଁ।
