ବଙ୍ଗୋପସାଗରରେ ପୁଣି ବାତ୍ୟା ଆଶଙ୍କ । ଆନ୍ଧ୍ରରୁ ବାଂଲାଦେଶ ପର୍ଯ୍ୟନ୍ତ ପ୍ରଭାବ ସମ୍ଭାବନା । ବଙ୍ଗୋପସାଗରରେ ପୁଣି ଏକ ବାତ୍ୟା ସୃଷ୍ଟି ହେବାର ଆଶଙ୍କା ଦେଖାଦେଇଛି । ଦକ୍ଷିଣ ବଙ୍ଗୋପସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେଉଥିବା ବେଳେ ଏହା ଆଗାମୀ ଦିନରେ ଅଧିକ ଶକ୍ତିଶାଳୀ ହୋଇପାରେ। ବିଶିଷ୍ଟ ପାଣିପାଗ ବିଶେଷଜ୍ଞ ଜାସନ୍ ନିକୋଲ୍ସ ସାମାଜିକ ଗଣମାଧ୍ୟମ Xରେ ଏଭଳି ପୂର୍ବାନୁମାନ ଦେଇଛନ୍ତି ।
ଜାସନ ନିକୋଲ୍ସଙ୍କ ପୂର୍ବାନୁମାନ ଅନୁସାରେ, ଦକ୍ଷିଣ ବଙ୍ଗୋପସାଗରରେ ସୃଷ୍ଟି ହେଉଥିବା ଲଘୁଚାପ ଉତ୍ତର-ପଶ୍ଚିମ ଦିଗକୁ ଗତି କରିବ । ଏହି ସମୟରେ ପାଣିପାଗ ବ୍ୟବସ୍ଥା କ୍ରମଶଃ ଘନୀଭୂତ ହେବା ସହ ଚଳିତ ସପ୍ତାହ ଶେଷ ଅର୍ଥାତ୍ ଶନିବାର କିମ୍ବା ରବିବାର ବେଳକୁ ଅବପାତରେ ପରିଣତ ହୋଇପାରେ । ଏହାପରେ ଅବପାତ ଆହୁରି ଶକ୍ତିଶାଳୀ ହୋଇ ଆସନ୍ତା ସପ୍ତାହରେ ବାତ୍ୟାର ରୂପ ନେବାର ସମ୍ଭାବନା ରହିଛି। ନିକୋଲ୍ସଙ୍କ ଆକଳନ ଅନୁଯାୟୀ, ଏହି ସମ୍ଭାବ୍ୟ ବାତ୍ୟା ଆନ୍ଧ୍ରପ୍ରଦେଶରୁ ପଶ୍ଚିମବଙ୍ଗ ଏବଂ ବାଂଲାଦେଶ ପର୍ଯ୍ୟନ୍ତ ବିସ୍ତୃତ ଉପକୂଳବର୍ତ୍ତୀ ଅଞ୍ଚଳର କୌଣସି ସ୍ଥାନକୁ ପ୍ରଭାବିତ କରିପାରେ ।
ତେବେ ଏହି ପାଣିପାଗ ବ୍ୟବସ୍ଥା ନିର୍ଦ୍ଦିଷ୍ଟ ଭାବେ କେଉଁ ଉପକୂଳ ଆଡ଼କୁ ଗତି କରିବ, କେଉଁଠି ସ୍ଥଳଭାଗ ଅତିକ୍ରମ କରିବ ଏବଂ ଏହାର ତୀବ୍ରତା କେତେ ରହିବ, ସେନେଇ ଏବେ ସ୍ପଷ୍ଟ ଚିତ୍ର ମିଳିନାହିଁ । ଏହା ଏକ ପ୍ରାରମ୍ଭିକ ପୂର୍ବାନୁମାନ ହୋଇଥିବାରୁ ଆଗାମୀ ଦିନରେ ଗତିପଥ ଓ ତୀବ୍ରତାରେ ପରିବର୍ତ୍ତନ ହୋଇପାରେ । ଆନ୍ଧ୍ରପ୍ରଦେଶରୁ ପଶ୍ଚିମବଙ୍ଗ ପର୍ଯ୍ୟନ୍ତ ସମ୍ଭାବ୍ୟ ପ୍ରଭାବ ଅଞ୍ଚଳ ମଧ୍ୟରେ ଓଡ଼ିଶା ଉପକୂଳ ମଧ୍ୟ ରହିଛି । ତେଣୁ ଏହି ପାଣିପାଗ ବ୍ୟବସ୍ଥାର ଗତିପଥ ଓଡ଼ିଶା ପାଇଁ ଗୁରୁତ୍ୱପୂର୍ଣ୍ଣ ।
ତେବେ ଓଡ଼ିଶାରେ ବାତ୍ୟା ସ୍ଥଳଭାଗ ଅତିକ୍ରମ କରିବ କିମ୍ବା ରାଜ୍ୟରେ ବଡ଼ ଧରଣର ପ୍ରଭାବ ପଡ଼ିବ ବୋଲି ଏବେଠାରୁ ନିଶ୍ଚିତ କୁହାଯାଇପାରିବ ନାହିଁ । ଲଘୁଚାପ ଅବପାତରେ ପରିଣତ ହେବା ପରେ ଏହାର କେନ୍ଦ୍ର, ଗତିର ଦିଗ ଓ ତୀବ୍ରତା ସମ୍ପର୍କରେ ଅଧିକ ସ୍ପଷ୍ଟ ସୂଚନା ମିଳିପାରେ ।
ବିଶେଷକରି ଆସନ୍ତା ୪୮ରୁ ୭୨ ଘଣ୍ଟା ମଧ୍ୟରେ ପାଣିପାଗ ବ୍ୟବସ୍ଥାର ଗତିବିଧି ଉପରେ ନଜର ରହିବ । ବାତ୍ୟା ଅର୍ଣ୍ଣବ ପରେ ବଙ୍ଗୋପସାଗରରେ ଆଉ ଏକ ସମ୍ଭାବ୍ୟ ବାତ୍ୟାକୁ ନେଇ ଚର୍ଚ୍ଚା ଆରମ୍ଭ ହୋଇଛି। ତେବେ ଜେସନ୍ ନିକୋଲ୍ସଙ୍କ ପୂର୍ବାନୁମାନକୁ ଏକ ସମ୍ଭାବ୍ୟ ପାଣିପାଗ ପରିସ୍ଥିତି ଭାବେ ଗ୍ରହଣ କରାଯିବା ଉଚିତ ।
