ଆଜି ଝାଡ଼ଖଣ୍ଡ ବନ୍ଦ । ଛାତ୍ରଙ୍କ ଉପରେ ଲାଠି ଚାର୍ଜ ବିରୋଧରେ ବିଜେପି ଆଜି ଝାଡ଼ଖଣ୍ଡ ବନ୍ଦ ଡାକରା ଦେଇଛି । ସକାଳ ୮ଟାରୁ ରାତି ୧୧ ଟା ଯାଏଁ ବନ୍ଦ ରହିବ ଝାଡ଼ଖଣ୍ଡ । ବନ୍ଦକୁ ନେଇ ସାରା ରାଜ୍ୟରେ ହାଇଆଲର୍ଟରେ ପୋଲିସ । ସମ୍ବେଦନଶୀଳ ଅଞ୍ଚଳ ଉପରେ କଣ୍ଟ୍ରୋଲ ରୁମ୍ରୁ ନଜର ରଖାଯିବ । ଏହାସହ ଡ୍ରୋନ୍ ମାଧ୍ୟମରେ ମଧ୍ୟ ନିରୀକ୍ଷଣ କରାଯିବ । ବନ୍ଦ ସମୟରେ କୌଣସି ଅପ୍ରୀତିକର ଘଟଣା କିମ୍ବା ଅରାଜକତା ଯେପରି ନଘଟେ, ସେଥିପାଇଁ ପୋଲିସ ପ୍ରସ୍ତୁତ ରହିଛି ।
ବିଶେଷ କରି ରାଞ୍ଚିର ଜୟପାଲ ସିଂହ ଷ୍ଟାଡିୟମରେ ଜମା ହେବାକୁ ଥିବା ଭିଡ଼ ଉପରେ ପୋଲିସର ତୀକ୍ଷ୍ଣ ନଜର ରହିବ । ପୂର୍ବଦିନ ଭଳି ପୁଣିଥରେ ପରିସ୍ଥିତି ଅଣାୟତ୍ତ ହେବାର ଆଶଙ୍କା ଥିବାରୁ ଜୟପାଲ ସିଂହ ଷ୍ଟାଡିୟମରୁ ବିଧାନସଭା ଭବନ ପର୍ଯ୍ୟନ୍ତ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି । ସହରର ପ୍ରମୁଖ ଛକ, ସମ୍ବେଦନଶୀଳ ଅଞ୍ଚଳ ଏବଂ ପ୍ରଦର୍ଶନସ୍ଥଳୀରେ ବରିଷ୍ଠ ପୋଲିସ ଅଧିକାରୀମାନେ ନିଜେ ଉପସ୍ଥିତ ରହି ପରିସ୍ଥିତି ଉପରେ ନଜର ରଖିବେ ।
ବନ୍ଦ ସମୟର ସୁରକ୍ଷା ବ୍ୟବସ୍ଥାର ମନିଟରିଂ ଦାୟିତ୍ୱ ରାଞ୍ଚି SSP ରାକେଶ ରଞ୍ଜନଙ୍କ ଉପରେ ରହିଛି । ବନ୍ଦ ଯୋଗୁଁ ଯେପରି ପରିବହନ ବ୍ୟବସ୍ଥା ବାଧାପ୍ରାପ୍ତ ନହୁଏ, ସେଥିପାଇଁ ସେ ନିର୍ଦ୍ଦେଶ ଦେଇଛନ୍ତି । ଏହାସହ କୌଣସି ସ୍ଥାନରେ ଅଧିକ ଭିଡ଼ ନଜମିବାକୁ ମଧ୍ୟ ପୋଲିସକୁ କୁହାଯାଇଛି ।
