ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ କେବଳ ନିଜର ଶାରୀରିକ ସୁସ୍ଥତା ବଜାୟ ରଖିବାକୁ ଚାହୁଁନାହାଁନ୍ତି, ବରଂ ଜୈବିକ ବାର୍ଦ୍ଧକ୍ୟକୁ ରୋକିବା ପାଇଁ ଏକ ନୂଆ ପ୍ରୟାସ ଆରମ୍ଭ କରିଛନ୍ତି। ନିକଟରେ ପ୍ରକାଶିତ ‘ଦି ୱାଲ୍ ଷ୍ଟ୍ରିଟ୍ ଜର୍ଣ୍ଣାଲ୍’ର ଏକ ରିପୋର୍ଟ ଅନୁଯାୟୀ, ରୁଷିଆ ସରକାର ଦେଶର ନାଗରିକମାନଙ୍କ ଆୟୁଷ ବୃଦ୍ଧି କରିବା ପାଇଁ “ନ୍ୟୁ ହେଲ୍ଥ ପ୍ରିଜରଭେସନ୍ ଟେକ୍ନୋଲୋଜି” ନାମକ ଏକ ବୃହତ୍ ଜାତୀୟ ପ୍ରକଳ୍ପ ଆରମ୍ଭ କରିଛନ୍ତି।
ଏହି ଅତ୍ୟାଧୁନିକ ମେଡିକାଲ୍ ପ୍ରକଳ୍ପ ପାଇଁ ସରକାରୀ ପାଣ୍ଠିରୁ ପ୍ରାୟ ୨୬ ବିଲିୟନ ଡଲାର ଖର୍ଚ୍ଚ କରାଯାଉଛି। କୃତ୍ରିମ ଅଙ୍ଗପ୍ରତ୍ୟଙ୍ଗ ପ୍ରତିରୋପଣ ଏବଂ ମାନବ କୋଷର ଆୟୁଷ ବୃଦ୍ଧି କରିବା ଏହି ପ୍ରକଳ୍ପର ମୁଖ୍ୟ ଲକ୍ଷ୍ୟ। ସିଏନ୍ଏନ୍ (CNN) ରିପୋର୍ଟ ଅନୁଯାୟୀ, ଗତ ବର୍ଷ ଚୀନ୍ରେ ଆୟୋଜିତ ଏକ ସାମରିକ ପରେଡ୍ ସମୟରେ ରାଷ୍ଟ୍ରପତି ପୁଟିନ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କୁ କହିଥିଲେ ଯେ କ୍ରମାଗତ ଅଙ୍ଗ ପ୍ରତିରୋପଣ ଦ୍ୱାରା ମଣିଷ ଅମରତ୍ୱ ଲାଭ କରିପାରିବ। ଏହାର ଉତ୍ତରରେ ଚୀନ୍ ରାଷ୍ଟ୍ରପତି ମଧ୍ୟ ଦାବି କରିଥିଲେ ଯେ, ଆଗାମୀ ଦଶନ୍ଧିରେ ମଣିଷର ହାରାହାରି ବୟସ ୧୫୦ ବର୍ଷରେ ପହଞ୍ଚିପାରିବ।
ରୁଷିଆର ରାଷ୍ଟ୍ର-ପୃଷ୍ଠପୋଷକତାରେ ପରିଚାଳିତ ଲାବୋରେଟୋରୀଗୁଡ଼ିକ ଶାରୀରିକ ଅବକ୍ଷୟକୁ ରୋକିବା ପାଇଁ ମୁଖ୍ୟତଃ ଦୁଇଟି ଅଭିନବ କୌଶଳ ଉପରେ କାମ କରୁଛନ୍ତି:
୩ଡି ବାୟୋ-ପ୍ରିଣ୍ଟିଂ (3D Bio-Printing): ଉନ୍ନତ ଜ୍ଞାନକୌଶଳ ସମ୍ପନ୍ନ ୩ଡି ପ୍ରିଣ୍ଟର ବ୍ୟବହାର କରି ଗବେଷକମାନେ କାର୍ଯ୍ୟକ୍ଷମ ଜୀବନ୍ତ ଟିସୁ ଏବଂ ଅଙ୍ଗ ପ୍ରସ୍ତୁତ କରୁଛନ୍ତି। ସେମାନେ ନିଜ ପରୀକ୍ଷାଗାରରେ ମାନବ କାର୍ଟିଲେଜ୍ ଏବଂ ମୂଷାର ଥାଇରଏଡ୍ ସଫଳତାର ସହ ବିକଶିତ କରିଥିବା ଜଣାପଡିଛି।
ଜେନେଟିକ୍ ଇଞ୍ଜିନିୟରିଂ (Genetic Engineering): ବୈଜ୍ଞାନିକମାନେ ମାନବ ଶରୀରରେ ପ୍ରତିରୋପଣ ପାଇଁ ଉପଯୁକ୍ତ ଅଙ୍ଗ ସୃଷ୍ଟି କରିବା ଉଦ୍ଦେଶ୍ୟରେ ଜିନ୍-ଏଡିଟେଡ୍ ମିନି-ଘୁଷୁରିମାନଙ୍କର ବଂଶବୃଦ୍ଧି କରାଉଛନ୍ତି। ଏହି ନୂତନ ଅଙ୍ଗ ପ୍ରତିରୋପଣ ପ୍ରକ୍ରିୟାକୁ ୨୦୩୦ ମସିହା ସୁଦ୍ଧା କାର୍ଯ୍ୟକ୍ଷମ କରିବାକୁ ରୁଷିଆ ସରକାର ଲକ୍ଷ୍ୟ ରଖିଛନ୍ତି।
ଏହି ବହୁମୂଲ୍ୟ ଏବଂ ଗୁରୁତ୍ୱପୂର୍ଣ୍ଣ ପ୍ରକଳ୍ପ ଉପରେ ସମ୍ପୂର୍ଣ୍ଣ ନିୟନ୍ତ୍ରଣ ରଖିବା ପାଇଁ କ୍ରେମଲିନ୍ ନିଜର ବିଶ୍ୱସ୍ତ ଲୋକଙ୍କୁ ଦାୟିତ୍ୱ ଦେଇଛି। ପୁଟିନଙ୍କ ବଡ଼ ଝିଅ ତଥା ପେସାଦାର ଏଣ୍ଡୋକ୍ରାଇନୋଲୋଜିଷ୍ଟ ମାରିଆ ଭୋରୋଣ୍ଟସୋଭା (Maria Vorontsova) ଏହି ମେଡିକାଲ୍ ସାଇନ୍ସ ପ୍ରୋଜେକ୍ଟର ସିଧାସଳଖ ତଦାରଖ କରୁଛନ୍ତି। ତାଙ୍କ ସହିତ ପ୍ରସିଦ୍ଧ ପଦାର୍ଥବିଜ୍ଞାନୀ ମିଖାଇଲ୍ କୋଭାଲଚୁକ ମଧ୍ୟ କାର୍ଯ୍ୟ କରୁଛନ୍ତି, ଯାହାଙ୍କୁ ଏହି ଆୟୁଷ ବୃଦ୍ଧି ଯୋଜନାର ମୁଖ୍ୟ ବିନ୍ଧାଣୀ ବୋଲି ବିବେଚନା କରାଯାଉଛି।
ମସ୍କୋ ପକ୍ଷରୁ ବିପୁଳ ପରିମାଣର ଅର୍ଥ ବିନିଯୋଗ କରାଯାଉଥିଲେ ମଧ୍ୟ ବିଶ୍ୱ ବୈଜ୍ଞାନିକ ସମୁଦାୟ ଏବଂ ରୁଷିଆର କିଛି ବିଶେଷଜ୍ଞ ଏହି ଯୋଜନାକୁ ନେଇ ସନ୍ଦେହ ପ୍ରକାଶ କରିଛନ୍ତି। ରୁଷିଆ ଛାଡ଼ି ପଳାଇଥିବା ବିଶିଷ୍ଟ ବୈଜ୍ଞାନିକ ଆଲେକ୍ସଜାଣ୍ଡାର୍ ଓଷ୍ଟ୍ରୋଭସ୍କି (Alexander Ostrovsky)ଙ୍କ ମତରେ, ଯେପର୍ଯ୍ୟନ୍ତ ଏହି ପ୍ରକଳ୍ପର ଫଳାଫଳକୁ ବୈଜ୍ଞାନିକ ଭାବେ ପ୍ରମାଣିତ କରାଯାଇନାହିଁ, ସେପର୍ଯ୍ୟନ୍ତ ଏହା କେବଳ ଏକ ରାଜନୈତିକ କଳ୍ପନା। ପୁଟିନଙ୍କୁ ଖୁସି କରିବା ଏବଂ ବିପୁଳ ପାଣ୍ଠି ହାତେଇବା ଲାଗି ପ୍ରକଳ୍ପ ନିର୍ଦ୍ଦେଶକମାନେ ଗବେଷଣାର ସ୍ଥିତି ସମ୍ପର୍କରେ କ୍ରେମଲିନକୁ ମିଥ୍ୟା ତଥ୍ୟ ଦେଉଥାଇ ପାରନ୍ତି ବୋଲି ସେ ଦାବି କରିଛନ୍ତି।
