ନୂଆ ଶ୍ରମ ଆଇନ ସହିତ ଜଡିତ ସମସ୍ତ ନିୟମକୁ ନୋଟିଫାଏ କରିଦିଆଯାଇଛି । ଏସବୁକୁ ନେଇ କେନ୍ଦ୍ର ସରକାର ଆଣିଛନ୍ତି ଏକ ବଡ଼ ପରିବର୍ତ୍ତନ । ଦେଶର ପୁରୁଣା ୨୯ଟି ଶ୍ରମ ଆଇନକୁ ହଟାଇ ଏବେ ଲାଗୁ ହେବାକୁ ଯାଉଛି ‘୪ଟି ନୂଆ ଲେବର କୋଡ୍’ । ଏଥିରେ ଦରମା, ଇଣ୍ଡଷ୍ଟ୍ରିଆଲ ରିଲେସନ, ସୋସିଆଲ ସିକ୍ୟୁରିଟି ଏବଂ କାମ ସହିତ ସଡିତ ସିକ୍ୟୁରିଟି ଏବଂ ୱାର୍କ କଲ୍ଚର ରହିଛି । ସରକାର ଏହି ନିୟମଗୁଡ଼ିକୁ ଖୁବଶୀଘ୍ର ସାରା ଦେଶରେ ଲାଗୁ କରିବାକୁ ଯାଉଛନ୍ତି ।
ଗ୍ରାଚ୍ୟୁଇଟି ନିୟମରେ କୋହଳ:
ପୂର୍ବରୁ ଗ୍ରାଚ୍ୟୁଇଟି ପାଇଁ ୫ ବର୍ଷ କାମ କରିବା ଜରୁରୀ ଥିଲା । କିନ୍ତୁ ଏବେ ‘ଫିକ୍ସଡ୍ ଟର୍ମ’ କର୍ମଚାରୀଙ୍କ ପାଇଁ ମାତ୍ର ବର୍ଷେ ଚାକିରି ପରେ ଗ୍ରାଚ୍ୟୁଇଟି ସୁବିଧା ମିଳିବ । ସାଧାରଣ କର୍ମଚାରୀଙ୍କ ପାଇଁ ଏହି ସୀମା ୫ ବର୍ଷ ରହିଛି ।
ଦରମା ଓ ପିଏଫ୍ ରେ ବଡ଼ ପରିବର୍ତ୍ତନ:
ଏବେ ଆପଣଙ୍କ ହାତକୁ ଆସୁଥିବା ‘ଇନ୍-ହ୍ୟାଣ୍ଡ ସାଲାରୀ’ କମିପାରେ, କିନ୍ତୁ ଭବିଷ୍ୟତ ସୁରକ୍ଷିତ ହେବ । ଆପଣଙ୍କ ମୋଟ ଦରମା (CTC) ର ଅତିକମରେ ୫୦% ବେସିକ୍ ସାଲାରୀ ହେବା ଅନିର୍ବାଯ୍ୟ । ବେସିକ୍ ସାଲାରୀ ବଢ଼ିବା ଦ୍ୱାରା ଆପଣଙ୍କ ପିଏଫ୍ କାଟ୍ ଅଧିକ ହେବ, ଯାହାଫଳରେ ଅବସର ସମୟରେ ଆପଣଙ୍କୁ ମୋଟା ଅଙ୍କର ଅର୍ଥ ମିଳିବ ।
ସପ୍ତାହକୁ ମାତ୍ର ୪ ଦିନ କାମ, ୩ ଦିନ ଛୁଟି:
ନୂଆ ନିୟମ ଅନୁଯାୟୀ, ଜଣେ କର୍ମଚାରୀଙ୍କୁ ସପ୍ତାହକୁ ସର୍ବାଧିକ ୪୮ ଘଣ୍ଟା କାମ କରିବାକୁ ପଡ଼ିବ । ଯଦି କମ୍ପାନୀ ଚାହେଁ, ତେବେ ଦିନକୁ ୧୨ ଘଣ୍ଟା କାମ କରାଇ କର୍ମଚାରୀଙ୍କୁ ସପ୍ତାହକୁ ୪ ଦିନ କାମ ଏବଂ ୩ ଦିନ ଛୁଟିର ବିକଳ୍ପ ଦେଇପାରିବ ।
ସମାନ କାମକୁ ସମାନ ଦରମା ଓ ଓଭରଟାଇମ୍:
ପୁରୁଷ ହେଉ କି ମହିଳା, ସମାନ କାମ ପାଇଁ କାହାରିକୁ କମ୍ ଦରମା ମିଳିବ ନାହିଁ । ଯଦି ଆପଣ ନିର୍ଦ୍ଧାରିତ ସମୟରୁ ଅଧିକ କାମ କରୁଛନ୍ତି, ତେବେ ଓଭରଟାଇମ୍ ପାଇଁ ଦୁଇଗୁଣା ଦରମା ଦେବାକୁ କମ୍ପାନୀ ବାଧ୍ୟ । ଇସ୍ତଫା କିମ୍ବା ଛଟେଇ ହେବାର ୨ ଦିନ ମଧ୍ୟରେ ସମସ୍ତ ବକେୟା ପାଉଣା ପରିଶୋଧ କରିବାକୁ ହେବ ।
ଶ୍ରମିକଙ୍କ କଲ୍ୟାଣ ଓ ସୁରକ୍ଷା:
ମହିଳାମାନେ ସକାଳ ୬ଟା ପୂର୍ବରୁ କିମ୍ବା ସନ୍ଧ୍ୟା ୭ଟା ପରେ ଅର୍ଥାତ୍ ନାଇଟ୍ ସିଫ୍ଟ କାମ କରନ୍ତି, ତେବେ ସେମାନଙ୍କ ସୁରକ୍ଷା ଦାୟିତ୍ୱ ସମ୍ପୂର୍ଣ୍ଣ ରୂପେ କମ୍ପାନୀର ରହିବ ।
ହେଲ୍ଥ ଚେକଅପ୍: କମ୍ପାନୀ ନିଜ ଖର୍ଚ୍ଚରେ କର୍ମଚାରୀଙ୍କ ମାଗଣା ସ୍ୱାସ୍ଥ୍ୟ ପରୀକ୍ଷା କରାଇବ ।
କ୍ୟାଣ୍ଟିନ୍ ଓ ଆମ୍ବୁଲାନ୍ସ: ୧୦୦ରୁ ଅଧିକ ଶ୍ରମିକ ଥିଲେ କ୍ୟାଣ୍ଟିନ୍ ଏବଂ ୫୦୦ରୁ ଅଧିକ ଥିଲେ ଆମ୍ବୁଲାନ୍ସ ରୁମ୍ ରହିବା ଜରୁରୀ ।
ବିପଦପୂର୍ଣ୍ଣ କାମ ପାଇଁ ଗର୍ଭବତୀ ମହିଳାଙ୍କୁ କାମ ଦେବା ଉପରେ ପ୍ରତିବନ୍ଧକ ରହିବ ।
ପ୍ରବାସୀ ଶ୍ରମିକ: ୧୦ରୁ ଅଧିକ ପ୍ରବାସୀ ଶ୍ରମିକ ଥିଲେ ସେମାନଙ୍କୁ ବର୍ଷକୁ ଥରେ ଘରକୁ ଯିବା ପାଇଁ ଯାତ୍ରା ଭତ୍ତା ମିଳିବ ।
ଠିକାଦାର ଦରମା ନ ଦେଲେ କମ୍ପାନୀ ଦାୟୀ ହେବ ।
ଛଟେଇରେ କ’ଣ ରହିବ ନିୟମ :
ଯଦି କୌଣସି କମ୍ପାନୀ କର୍ମଚାରୀଙ୍କୁ ବାହାର କରିବାକୁ ଚାହେଁ, ୧୦୦ରୁ ଅଧିକ କର୍ମଚାରୀ ଥିବା ସଂସ୍ଥାରେ ‘ୱାର୍କ କମିଟି’ ଗଠନ ହେବ । ୩୦୦ରୁ ଅଧିକ ଶ୍ରମିକ ଥିବା କମ୍ପାନୀକୁ ଛଟେଇ ପାଇଁ ସରକାରଙ୍କ ଅନୁମତି ନେବାକୁ ପଡ଼ିବ ଏବଂ ୩ ମାସ ପୂର୍ବରୁ ନୋଟିସ୍ ଦେବାକୁ ହେବ । ତେବେ ଏହି ନୂଆ ଲେବର କୋଡ୍ ଦ୍ୱାରା ଦେଶର ଶ୍ରମିକ ଶ୍ରେଣୀ ଅଧିକ ସୁଦୃଢ଼ ହେବେ ବୋଲି ଆଶା କରାଯାଉଛି ।
