କିଏ ପାଣିରୁ ବାହାରିବା ପାଇଁ ଚେଷ୍ଟା କରୁଛି ତ କିଏ ଜୀବନ ମରଣ ସହ ସଂଘର୍ଷ କରୁଛି, ଉତ୍ତରାଖଣ୍ଡର କରୁଣ କାହାଣୀ

ସବୁକିଛି ସରିଗଲା ଆଉ କିଛି ନାହିଁ..ସବୁ ଛାରଖାର ହୋଇଗଲା…. ଏ ହେଉଛି ଉତ୍ତରକାଶୀର ଧରାଲି ଗାଁରେ ବାଦଲଫଟା ବର୍ଷା ଯୋଗୁଁ ହୋଇଥିବା ଧ୍ୱଂସାବଶେଷକୁ ଦେଖିଥିବା ଜଣେ ପ୍ରତ୍ୟକ୍ଷଦର୍ଶୀଙ୍କ କଥା । ମଙ୍ଗଳବାର ଧରାଲିରେ ହୋଇଥିବା ଧ୍ୱଂସାବଶେଷ ପରେ, ସୋସିଆଲ ମିଡିଆରେ ଏପରି ଅନେକ ଭିଡିଓ ଭାଇରାଲ ହେଉଛି ଯେଉଁଥିରେ ଲୋକଙ୍କ କ୍ରନ୍ଦନ, ଭୟଙ୍କର ଚିତ୍କାର ସ୍ପଷ୍ଟ ଭାବରେ ଶୁଣାଯାଉଛି । ଅନ୍ୟ କିଛି ଲୋକ ଚିତ୍କାର କରୁଥିବା, ଦୌଡ଼ୁଥିବା ଏବଂ ନିଜ ଜୀବନ ବଞ୍ଚାଇବାର ଦେଖିବାକୁ ମିଳୁଛି ।

କିଏ ପାଣିରୁ ବାହାରିବା ପାଇଁ ଚେଷ୍ଟା କରୁଛି ତ କିଏ ଜୀବନ ମରଣ ସହ ସଂଘର୍ଷ କରୁଛି । ଏହି ଘଟଣା ୨୦୧୩ର କେଦାରନାଥ ବିପର୍ଯ୍ୟୟକୁ ପୁଣିଥରେ ମନରେ ତାଜା କରିଦେଇଛି । ଯୁଆଡେ ଦେଖିବ ପାଣି ଆଉ ମାଟି । ସବୁଠାରେ ଦେଖାଯାଉଥାଏ କେବଳ ଘର ଗୁଡିକର ଛାତ ଆଉ ସବୁ ମାଟିତଳେ ଧସି ହୋଇଯାଇଛି । ଯେତିକି ଭୟଙ୍କର ସେତିକି ହୃଦୟ ବିଦାରକ ଥିଲା ଏ ଦୃଶ୍ୟ । ଏହି ଘଟଣାର ଜଣେ ପ୍ରତ୍ୟକ୍ଷଦର୍ଶୀ କହିଛନ୍ତି ଯେ ସେ ତାଙ୍କ ଜୀବନରେ ଏଭଳି ଭୟଙ୍କର ଦୃଶ୍ୟ କେବେ ଦେଖି ନାହାଁନ୍ତି ।

ହଁ ଆଜ୍ଞା, ଉତ୍ତରାଖଣ୍ଡର ଉତ୍ତରକାଶୀରେ ପ୍ରକୃତିର ତାଣ୍ଡବ । ରାଗିଲା ପ୍ରକୃତି, ରଚିଲା ପ୍ରଳୟ । ଛାରଖାର ଉତ୍ତରକାଶୀ । ବାଦଲଫଟା ବର୍ଷାରେ ଧରାଶାୟୀ ଉତ୍ତରକାଶୀର ଧରାଲି । ଭସ୍ଖଳନ ପରେ ଆସୁଛି ଭୟଙ୍କର ଦୃଶ୍ୟ । ଆଁ କରି ରହିଛି ରାସ୍ତାଘାଟ । ୮ରୁ ୧୧ ଜଣ ଯବାନଙ୍କ ସହ ୫୦ରୁ ଅଧିକ ଲୋକ ନିଖୋଜ ଅଛନ୍ତି । ବିପର୍ଯ୍ୟୟରେଏପର୍ଯ୍ୟନ୍ତ ୪ ଜଣଙ୍କ ମୃତ୍ୟୁ ହୋଇଛି । ୧୫୦ ଜଣଙ୍କୁ ସୁରକ୍ଷିତ ଉଦ୍ଧାର କରାଯାଛି । ଭାସିଯାଇଛି ଘରଦ୍ୱାର, ଦୋକାନ ବଜାର ଓ ହୋଟେଲ । ଧରାଲି ଗାଁରେ ତାଣ୍ଡବ ରଚିଛି ବାଦଲ ଫଟା ବର୍ଷା ।

ତେବେ ଏହା ଭିତରେ ଜଣେ ଭାରତୀୟ ସେନା ଅଧିକାରୀ କହିଛନ୍ତି ଯେ ତଳ ହର୍ଷିଲ ଘାଟି ଅଞ୍ଚଳର ଏକ ସେନା ଶିବିରରୁ ୮-୧୦ ଜଣ ଭାରତୀୟ ସେନା ଯବାନ ନିଖୋଜ ଅଛନ୍ତି । ସେମାନଙ୍କୁ ଖୋଜିବା ପାଇଁ ଏକ ବଡ଼ ଧରଣର ଅଭିଯାନ ଆରମ୍ଭ କରାଯାଇଛି । ଉଦ୍ଧାର କାର୍ଯ୍ୟ ପାଇଁ ହେଲିକପ୍ଟରର ବ୍ୟବହାର କରାଯାଉଛି । ତେବେ ଏଭଳି ବିପଦ ସମୟରେ ଯବାନମାନେ ହିଁ ଲୋକଙ୍କ ସାହା ହୋଇ ଠିଆ ହୁଅନ୍ତି । କିନ୍ତୁ ଏଠାରେ ଯବାନମାନେ ବି ନିଖୋଜ ଅଛନ୍ତି । ହର୍ଷିଲ ପୋଷ୍ଟରେ ଅବସ୍ଥିତ ଭାରତୀୟ ସେନା ପ୍ରଥମେ ପ୍ରତିକ୍ରିୟା ପ୍ରକାଶ କରିଥିଲା ।

ମାତ୍ର ୧୦ ମିନିଟ୍ ମଧ୍ୟରେ ଗାଁରେ ଲୋକଙ୍କ ସହାୟତା ପାଇଁ ପହଞ୍ଚିଥିଲା ଭାରତୀୟ ସେନା । ଯେଉଁଥିରେ ପ୍ରାୟ ୨୦ ଜଣଙ୍କୁ ଉଦ୍ଧାର କରାଯାଇଛି ଏବଂ ଆହତମାନଙ୍କୁ ଚିକିତ୍ସା କରାଯାଉଛି । ତେବେ ଏହି ବନ୍ୟା କାରଣରୁ ଭାରତୀୟ ସେନାର ଶିବିର ଓ ଉଦ୍ଧାରକାରୀ ଦଳର କିଛି ଲୋକ ପ୍ରଭାବିତ ହୋଇଥିଲେ । ସେଥିମଧ୍ୟରୁ କିଛି ନିଖୋଜ ମଧ୍ୟ ଅଛନ୍ତି । କିନ୍ତୁ ସବୁଠାରୁ ବଡ଼ କଥା ହେଉଛି ଏହି ଘଟଣାରେ କିଛି ଭାରତୀୟ ସେନା ନିଖୋଜ ହେବା ପରେ ମଧ୍ୟ ଅନ୍ୟ ଭାରତୀୟ ସେନା କର୍ମଚାରୀମାନେ ରିଲିଫ୍ କାର୍ଯ୍ୟରେ ନିୟୋଜିତ ଅଛନ୍ତି ।

ଉତ୍ତରକାଶୀ ଜିଲ୍ଲା ଧରାଲୀ ଗାଁର ଖୀର ଗଙ୍ଗା ନଦୀର ଉପର ଅଞ୍ଚଳରେ ବାଦଳ ଫାଟିବାରୁ ତୀବ୍ର ବନ୍ୟା ଏବଂ ମାଟି ଧସିଛି । ପାହାଡ଼ରୁ ଅଚାନକ ପାଣି ମାଡ଼ି ଆସି ଗାଁରେ ଥିବା ଘରଗୁଡିକୁ ଭସାଇ ନେଇଛି । ବଜାରଠାରୁ ଆରମ୍ଭ କରି ହୋଟେଲ ସବୁକିଛି ବନ୍ୟା ଓ ଭୂସ୍ଖଳନରେ ଛାରଖାର ହୋଇଯାଇଛି । ଜୋରସୋର ଚାଲିଛି ଉଦ୍ଧାର କାର୍ଯ୍ୟ । ଏସଡିଆରଏଫ, ଏନଡିଆରଏଫ ଏବଂ ଜିଲ୍ଲା ପ୍ରଶାସନ ଉଦ୍ଧାର କାର୍ଯ୍ୟରେ ଲାଗିଛନ୍ତି । ରେସକ୍ୟୁରେ ସାମିଲ ଅଛନ୍ତି ITBP ଯବାନ ।

ତେବେ ପ୍ରବଳ ବର୍ଷା ଲାଗିରହିଥିବାରୁ ରେସକ୍ୟୁ ଅପରେସନ ବାଧାପ୍ରାପ୍ତ ହୋଇଛି । ଅନ୍ୟପଟେ ୯ ତାରିଖ ଯାଏ ଅତି ପ୍ରବଳ ବର୍ଷା ପାଇଁ ରେଡ ଆଲର୍ଟ ଜାରି ହୋଇଛି । ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମୀ ସ୍ଥିତି ଉପରେ ନଜର ରଖିଛନ୍ତି । ମଙ୍ଗଳବାର ଦିନ ଉତ୍ତରକାଶୀର ଧରାଲି ଗାଁରେ ମେଘ ଫାଟିବା ଯୋଗୁଁ ଖୀର ଗଙ୍ଗା ନଦୀରେ ବନ୍ୟା ଆସିବାରୁ ଏପର୍ଯ୍ୟନ୍ତ ଚାରି ଜଣଙ୍କର ମୃତ୍ୟୁ ହୋଇଛି ଏବଂ ୫୦ ଜଣ ନିଖୋଜ ଅଛନ୍ତି । ୧୩୮ ରୁ ଅଧିକ ଲୋକଙ୍କୁ ଉଦ୍ଧାର କରାଯାଇଛି । ପ୍ରଶାସନ ପକ୍ଷରୁ ନିରନ୍ତର ଉଦ୍ଧାର କାର୍ଯ୍ୟ ଜାରି ରହିଛି ।

ସେହିଭଳି ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି ଆଜି ସକାଳେ ଉତ୍ତରକାଶୀରେ ପହଞ୍ଚି ରିଲିଫ୍ କାର୍ଯ୍ୟର ସମୀକ୍ଷା କରିଛନ୍ତି । ମୁଖ୍ୟମନ୍ତ୍ରୀ ଧାମି କହିଛନ୍ତି ଯେ ଉତ୍ତରକାଶୀରେ ହୋଇଥିବା କ୍ଷୟକ୍ଷତି ପରେ, ରିଲିଫ୍ ଏବଂ ଉଦ୍ଧାର କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ କରାଯାଉଛି । ପ୍ରଭାବିତଙ୍କୁ ଶୀଘ୍ର ଏବଂ ଉପଯୁକ୍ତ ସହାୟତା ଯୋଗାଇବା ପାଇଁ ପ୍ରୟାସ କରାଯାଉଛି । ବନ୍ୟା ଯୋଗୁଁ ଅନେକ ଅଞ୍ଚଳ ଯୋଗାଯୋଗ ବିଚ୍ଛିନ୍ନ ହୋଇଛି । ସେହି ସମୟରେ, ବିଦ୍ୟୁତ୍ ବ୍ୟବସ୍ଥା ମଧ୍ୟ ବାଧାପ୍ରାପ୍ତ ହୋଇଛି, ଯାହାକୁ ପୁନରୁଦ୍ଧାର କରିବାକୁ ଚେଷ୍ଟା କରାଯାଉଛି ।

ଏହି ମର୍ମନ୍ତୁଦ ପ୍ରାକୃତିକ ବିପର୍ଯ୍ୟୟର ଅନେକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଯେଉଁଥିରେ ଲୋକମାନେ ଭୟରେ ଚିତ୍କାର କରୁଥିବାର ଶୁଣିବାକୁ ମିଳୁଛି । ବାଦଲଫଟା ବର୍ଷା ଯୋଗୁଁ ଏଭଳି ବନ୍ୟା ଆସିଥିଲା ଯେ ସମ୍ପୂର୍ଣ୍ଣ ଧରାଲି ୩୪ ସେକେଣ୍ଡ ମଧ୍ୟରେ ନଷ୍ଟ ହୋଇଯାଇଥିଲା । ଅନ୍ୟପଟେ ତେବେ ପ୍ରବଳ ବର୍ଷା ଲାଗିରହିଥିବାରୁ ରେସକ୍ୟୁ ଅପରେସନ ବାଧାପ୍ରାପ୍ତ ହୋଇଛି । ଘଟଣାକୁ ନେଇ ପ୍ରଧାନମନ୍ତ୍ରୀ ଦୁଃଖ ପ୍ରକାଶ କରିବା ସହ ଉଦ୍ଧାର କାର୍ଯ୍ୟରେ କେନ୍ଦ୍ରୀୟ ସହାୟତା ପାଇଁ ଘୋଷଣା କରିଛନ୍ତି ।