ଦେଶର ନୂଆପିଢି କେବଳ ବହିରୁ ବିଜ୍ଞାନ କିମ୍ବା ଗଣିତ ନୁହେଁ, ବରଂ ଦେଶର ରକ୍ଷା ରଣନୀତି ଏବଂ ଆତଙ୍କବାଦ ବିପକ୍ଷରେ ମଧ୍ୟ ଜାଣିବେ । ନ୍ୟାସନାଲ୍ କାଉନସିଲ୍ ଅଫ୍ ଏଜୁକେସନାଲ୍ ରିସର୍ଚ ଆଣ୍ଡ ଟ୍ରେନିଂ (NCERT) ଭାରତର ପ୍ରତିରକ୍ଷା ରଣନୀତି ଏବଂ କୂଟନୈତିକ ପ୍ରତିକ୍ରିୟା ବିଷୟରେ ଛାତ୍ରଛାତ୍ରୀଙ୍କୁ ଶିକ୍ଷା ଦେବା ପାଇଁ ଅପରେସନ୍ ସିନ୍ଦୂର ଉପରେ ଏକ ସ୍ୱତନ୍ତ୍ର ପାଠ୍ୟକ୍ରମ ମଡ୍ୟୁଲ୍ ପ୍ରସ୍ତୁତ କରୁଛି । ଏହି ମଡ୍ୟୁଲ୍ ଦୁଇଟି ଭାଗରେ ବିଭକ୍ତ ହେବ । ପ୍ରଥମ ଭାଗ କ୍ଲାସ୍ ୩ ରୁ ୮ ପର୍ଯ୍ୟନ୍ତ ଏବଂ ଦ୍ୱିତୀୟ ଭାଗ କ୍ଲାସ୍ ୯ ରୁ ୧୨ ପର୍ଯ୍ୟନ୍ତ ଛାତ୍ରଛାତ୍ରୀଙ୍କ ପାଇଁ ପ୍ରସ୍ତୁତ ହେବ । ଏହି ମଡ୍ୟୁଲ୍ ୮ ରୁ ୧୦ ପୃଷ୍ଠା ମଧ୍ୟରେ ପ୍ରସ୍ତୁତ ହେବ ।
ଏହି ମଡ୍ୟୁଲର ମୁଖ୍ୟ ଉଦ୍ଦେଶ୍ୟ ହେଉଛି, ଛାତ୍ରଛାତ୍ରୀଙ୍କୁ ଆତଙ୍କବାଦୀ ବିପଦ ପ୍ରତି ରାଷ୍ଟ୍ରଗୁଡ଼ିକ କିପରି ପ୍ରତିକ୍ରିୟା କରେ ଏବଂ ପ୍ରତିରକ୍ଷା, କୂଟନୀତି ଏବଂ ମନ୍ତ୍ରଣାଳୟଗୁଡ଼ିକ ମଧ୍ୟରେ ସମନ୍ୱୟ ଜାତୀୟ ସୁରକ୍ଷାରେ କିପରି ଭୂମିକା ନିର୍ବାହ କରେ ତାହା ବୁଝାଇବା । ଏହା ସହିତ, ଏହି ମଡ୍ୟୁଲ୍ ଭାରତର ସାମରିକ ଶକ୍ତି, ବୈଜ୍ଞାନିକ ଅଗ୍ରଗତି ଏବଂ ଜାତୀୟ ଗୌରବକୁ ପ୍ରୋତ୍ସାହନ ଦେବା ପାଇଁ ଉଦ୍ଦିଷ୍ଟ ।
ଏହି ମଡ୍ୟୁଲ୍ ଇତିହାସ ଏବଂ ରାଜନୀତି ବିଜ୍ଞାନ ଭଳି ବିଷୟଗୁଡ଼ିକରେ ସାମିଲ ହେବ ଏବଂ ଶିକ୍ଷକମାନଙ୍କୁ
ଏହା ଶିକ୍ଷା ଦେବା ପାଇଁ ସ୍ୱତନ୍ତ୍ର ତାଲିମ ପ୍ରଦାନ କରାଯିବ । DIKSHA ଭଳି ଡିଜିଟାଲ୍ ପ୍ଲାଟଫର୍ମରେ ଭିଡିଓ, କୁଇଜ୍ ଏବଂ ଇଣ୍ଟରଆକ୍ଟିଭ୍ ସାମଗ୍ରୀ ମଧ୍ୟ ଉପଲବ୍ଧ ହେବ ।
ଅପରେସନ୍ ସିନ୍ଦୂର ଉପରେ ଏକ ସ୍ୱତନ୍ତ୍ର ଆଲୋଚନା ଲୋକସଭାରେ ଜୁଲାଇ ୨୮ ତାରିଖରୁ ଆରମ୍ଭ ହେବ, ଯେଉଁଥିରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ଗୃହ ମନ୍ତ୍ରୀ ଅମିତ ଶାହ ଏବଂ ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର ଅଂଶଗ୍ରହଣ କରିବେ ବୋଲି ଆଶା କରାଯାଉଛି । ଏହି ଆଲୋଚନା ୧୬ ଘଣ୍ଟା ଧରି ତିନି ଦିନ ପର୍ଯ୍ୟନ୍ତ ଚାଲିବ ।
ସୂଚନାଯୋଗ୍ୟ, ୨୦୨୫ ମସିହା ଏପ୍ରିଲ ୨୨ ତାରିଖରେ ଜମ୍ମୁ କଶ୍ମୀର ପହଲଗାମରେ ହୋଇଥିବା ଭୟଙ୍କର ଆତଙ୍କବାଦୀ ଆକ୍ରମଣରେ ୨୬ ଜଣଙ୍କୁ ସେମାନଙ୍କ ପରିବାର ସମ୍ମୁଖରେ ହତ୍ୟା କରାଯାଇଥିଲା । ଏହାର ପ୍ରତିଶୋଧ ସ୍ୱରୂପ ଭାରତ ପାକିସ୍ତାନ ଅଧିକୃତ କଶ୍ମୀର ଏବଂ ପାକିସ୍ତାନରେ ଥିବା ବିଭିନ୍ନ ଆତଙ୍କବାଦୀ ଠିକଣାଗୁଡ଼ିକୁ ଟାର୍ଗେଟ କରି ଅପରେସନ୍ ସିନ୍ଦୁର ଆରମ୍ଭ କରିଥିଲା ।
