ସଂଚାର ବ୍ୟୁରୋ: ଜାମ୍ମୁ ଓ କାଶ୍ମୀର ନିର୍ବାଚନ ଲାଗି ବିଜେପି ପ୍ରାର୍ଥୀ ତାଲିକାରେ ଗଡ଼ବଡ଼। ପ୍ରଥମ ପର୍ଯ୍ୟାୟ ଲାଗି ଘୋଷିତ ୪୪ ଜଣିଆ ପ୍ରାର୍ଥୀ ତାଲିକାକୁ ପ୍ରତ୍ଯାହାର କରିଛି ବିଜେପି। ତାଲିକା ଘୋଷଣାର କିଛି ଘଣ୍ଟା ପରେ ଏହାକୁ ପ୍ରତ୍ଯାହାର କରିବା ଘଟଣା ହଟଚମଟ ସୃଷ୍ଟି କରିଛି। ପ୍ରଥମ ପର୍ଯ୍ୟାୟ ତାଲିକାରେ ସଂଶୋଧନ କରାଯିବା ପରେ ପୁଣି ତାହାକୁ ପ୍ରକାଶ କରାଯିବ ବୋଲି କୁହାଯାଇଛି। ତାଲିକାରେ ୧୪ ଜଣ ମୁସଲିମଙ୍କୁ ପ୍ରାର୍ଥୀ କରାଯାଇଥିଲା।
ସେହିପରି ଜଣେ ମାତ୍ର ମହିଳାଙ୍କୁ ଅର୍ଥାତ କିସ୍ତୱାରରୁ ସାଗୁନ ପରିହାରଙ୍କୁ ପ୍ରାର୍ଥୀ କରିଥିଲା ଦଳ। ଜାମ୍ମୁ ଓ କାଶ୍ମୀର ବିଜେପି ସଭାପତି ରବିନ୍ଦର ରାଇନା, ପୂର୍ବତନ ଉପମୁଖ୍ଯମନ୍ତ୍ରୀ ନିର୍ମଳ ସିଂ ଓ କବିନ୍ଦର ଗୁପ୍ତାଙ୍କ ନାଁ ତାଲିକାରୁ ବାଦ ପଡ଼ିଥିଲା। ପ୍ରଥମ ପର୍ଯ୍ୟାୟ ଲାଗି ୧୫, ଦ୍ବିତୀୟ ପର୍ଯ୍ୟାୟ ଲାଗି ୧୦ ଓ ତୃତୀୟ ପର୍ଯ୍ୟାୟ ଲାଗି ୧୯ ଜଣଙ୍କ ନାଁ ଘୋଷଣା କରିଥିଲା ବିଜେପି। ଯେଉଁ ପ୍ରମୁଖ ପ୍ରାର୍ଥୀଙ୍କ ନାଁ ଏଥିରେ ରହିଥିଲା ସେମାନେ ହେଲେ ପାମ୍ପୋରରୁ ପ୍ରାର୍ଥୀ ହୋଇଥିବା ଇଞ୍ଜିନିୟର ସୟଦ ସୌକତ ଗାୟୁର ଆନ୍ଦରାବି ଓ ଅନନ୍ତନାଗରୁ ଲଢୁଥିବା ମହମ୍ମଦ ରଫିକ ୱାନି। ଆସନ୍ତା ସେପ୍ଟେମ୍ବର ୧୮, ସେପ୍ଟେମ୍ବର ୨୫ ଓ ଅକ୍ଟୋବର ୧ରେ ହେବ ଜାମ୍ମୁ ଓ କାଶ୍ମୀରରେ ତିନି ପର୍ଯ୍ୟାୟରେ ନିର୍ବାଚନ।
ଆସନ୍ତାକାଲି ପ୍ରଥମ ପର୍ଯ୍ୟାୟ ନିର୍ବାଚନ ଲାଗି ରହିଛି ପ୍ରାର୍ଥିପତ୍ର ଦାଖଲର ଶେଷ ତାରିଖ। ସେପଟେ ଜାମ୍ମୁ ଓ କାଶ୍ମୀରରେ କଂଗ୍ରେସ ଓ ନ୍ଯାସନାଲ କନଫରେନ୍ସ ମଧ୍ଯରେ ଆସନ ବୁଝାମଣା ପ୍ରସଙ୍ଗ। ସମ୍ଭାବ୍ଯ ମେଣ୍ଟ ନେଇ ବିବାଦ ସୃଷ୍ଟି ହେବା ପରେ ସଙ୍କଟର ସମାଧାନ ଟାଳିବାକୁ ସେଠାକୁ କେ.ସି. ଭେନୁଗୋପାଲ ଓ ସଲମାନ ଖୁର୍ସିଦଙ୍କୁ ପଠାଯାଇଛି। ସେମାନେ ନ୍ଯାସନାଲ କନଫରେନ୍ସ ସ ନେତା ଫାରୁର ଅବଦୁଲ୍ଲା ଓ ଓମାର ଅବଦୁଲ୍ଲାଙ୍କୁ ଭେଟିବେ।
