ପଞ୍ଜାବ ପୋଲିସକୁ ବଡ଼ ସଫଳତା ମିଳିଛି । ପୁଣି ବନ୍ଧା ହେଲେ ଆଉ ଜଣେ ଗୁପ୍ତଚର । ପାକିସ୍ତାନ ପାଇଁ କରୁଥିଲେ ଗୁପ୍ତଗିରି । ତାଙ୍କ ନାମ ଗଗନଦୀପ ସିଂ ହୋଇଥିବା ବେଳେ ସେ ପାକିସ୍ତାନର ଆଇଏସଆଇ ଓ ଖଲିସ୍ତାନୀ ଲିଡର ଗୋପାଳ ସିଂ ଚାୱଲା ପାଇଁ ଗୁପ୍ତଗିରି କରୁଥିଲେ । ପାକିସ୍ତାନକୁ ଭାରତୀୟ ପ୍ରତିରକ୍ଷା ବିଭାଗର ବହୁ ଗୁପ୍ତତଥ୍ୟ ଦେଇଥିବା ଅଭିଯୋଗରେ ପଞ୍ଜାବ ପୋଲିସ ତାଙ୍କୁ ଗିରଫ କରିଛି ।
ଅପରେସନ୍ ସିନ୍ଦୂର ସମୟରେ ଭାରତରେ ସେନାର ଚଳପ୍ରଚଳ ସମ୍ପର୍କରେ ସେ ସୂଚନା ଦେଉଥିଲେ । ପୋଲିସକୁ ତାଙ୍କ ଠାରୁ ଗୋଟିଏ ମୋବାଇଲ୍ ଫୋନ୍ ଜବତ କରିଛି । ତାଙ୍କ ମୋବାଇଲରୁ ଆଇଏସଆଇ ଏଜେଣ୍ଟର ୨୦ ଜଣଙ୍କ ନମ୍ବର ପୋଲିସକୁ ମିଳିଛି ।
ଗଗନଦୀପ ଇଣ୍ଡିଆନ ଆର୍ମିର ସ୍ଥିତି ଏବଂ ଠିକଣା ବିଷୟରେ ପାକିସ୍ତାନକୁ ସୂଚନା ଦେଉଥିଲେ । ଗଗନଦୀପ ଖଲିସ୍ତାନୀ ଆତଙ୍କୀ ଗୋପାଳ ସିଂ ଚାୱଲାଙ୍କ ସହିତ ଗତ ୫ ବର୍ଷ ହେଲାଣି ସଂପର୍କରେ ଥିଲେ । ଚାୱଲା ଗଗନଦୀପଙ୍କ ସଂପର୍କ ଆଇଏସଆଇ ସହିତ କରିଥିଲେ । ସୂଚନା ମୁତାବକ, ଆଇଏସଆଇ ଏଜେଣ୍ଟ ଗଗନଦୀପଙ୍କୁ ପଇସା ମଧ୍ୟ ପଠାଇଛନ୍ତି ।
ଅପରେସନ ସିନ୍ଦୂର ସମୟରେ ସମଗ୍ର ଦେଶ ପାକିସ୍ତାନ ଉପରେ ପ୍ରତିଶୋଧ ନେବାକୁ ଦାବି କରୁଥିବା ବେଳେ ପଞ୍ଜାବର ଗଗନଦୀପ ଦେଶର ଗୁଇନ୍ଦା ସୂଚନା ଶତ୍ରୁକୁ ଦେଇଥିଲା ।
ସୂଚନାଯୋଗ୍ୟ, ଅପରେସନ ‘ସିନ୍ଦୂର’ ପରେ ପଞ୍ଜାବ ଏବଂ ହରିୟାଣାରୁ ୧୫ରୁ ଅଧିକ ଗୁପ୍ତଚରଙ୍କୁ ଗିରଫ କରାଯାଇଛି। ଏମାନେ ସମସ୍ତେ ଭାରତରେ ରହି ଆଇଏସଆଇ ନିର୍ଦେଶରେ କାର୍ଯ୍ୟ କରୁଥିବା ଅଭିଯୋଗ ହୋଇଛି। ଦେଶରେ ଲୁଚିଥିବା ଗୁପ୍ତଚରକୁ ଧରିବା ପାଇଁ ପୋଲିସ ଯାଞ୍ଚ କରୁଛି । ଜ୍ୟୋତି ମଲହୋତ୍ରାଙ୍କ ଗିରଫ ପରେ ଦେଶରେ ଅନ୍ୟ କେତେ ଜଣଙ୍କୁ ପୋଲିସ ଗିରଫ କରିଛି । ପଞ୍ଜାବ, ହରିୟାଣା, ମହାରାଷ୍ଟ୍ର, ଉତ୍ତର ପ୍ରଦେଶ, ଗୁଜରାଟ, ଦିଲ୍ଲୀ, ରାଜସ୍ଥାନ ସମତେ ଅନେକ ସ୍ଥାନରୁ ଗୁପ୍ତଚରଙ୍କୁ ଗିରଫ କରାଯାଇଛି ।
