ସଂଚାର ବ୍ୟୁରୋ: କାଳବୈଶାଖୀର ଅଦିନିଆ ବର୍ଷା ଚାଷୀଙ୍କ ପରିଶ୍ରମକୁ ଧୋଇନେଇଛି । ଚିନ୍ତାରେ ଚାଷୀ। ବର୍ଷାଯୋଗୁଁ ଫସଲ ଅମଳ ପୂର୍ବରୁ ଚାଷ ଜମିରେ ଫଳିଥିବା ସୁନାର ଫସଲ ଏବେ ପାଣିରେ ବୁଡି ଗଜା ହୋଇଛି । ବଲାଙ୍ଗିର ଜିଲା ବଙ୍ଗୋମୁଣ୍ଡା ବ୍ଲକର ବଳଧା ପଞ୍ଚାୟତର ସାନମୂଳା, ବଳଧା,ସିନ୍ଧଭାଡ଼ି ଓ ଜାମଖୁଣ୍ଟା ପଞ୍ଚାୟତର ଚାଷୀଙ୍କ ଧାନ ଚାଷ ନଷ୍ଟ ହୋଇଯାଇଛି। ଧାର କରଜ କରି ଚାଷ କରିଥିବା ଚାଷୀ ମୁଣ୍ଡରେ ପଡିଛି ଚଡକ । ଧାନ ସବୁ ଗଜା ହୋଇ ନଷ୍ଟ ହୋଇଯାଇଛି । ଏହି ପଞ୍ଚାୟତରେ ରବି ଧାନ ଫସଲ ଭଲ ହୋଇଥିଲେ ମଧ୍ୟ ଏବେ କିନ୍ତୁ ଚାଷୀ ନିରାଶ ହୋଇଛି । ଶହଶହ ଏକରରେ ଚାଷୀ ଅମଳ କରିଥିବା ଚାଷ ନଷ୍ଟକୁ ପ୍ରଶାସନ ବୁଲି ଦେଖିବା ସହ କ୍ଷୟକ୍ଷତିର ଆକଳନ କରି କ୍ଷତିପୂରଣ ଦେବାକୁ ଦାବି ହୋଇଛି। ସେପଟେ ପରିଦର୍ଶନ କରି ରିପୋର୍ଟ ପ୍ରସ୍ତୁତ କରିବୁ ବୋଲି କହିଛନ୍ତି ବ୍ଲକ କୃଷି ଅଧିକାରୀ।
