ନୂଆଦିଲ୍ଲୀ: ଭାରତ ପାକିସ୍ତାନ ମଧ୍ୟରେ ଲାଗି ରହିଥିବା ଉତ୍ତେଜନାକୁ ନେଇ ସୀମାବର୍ତ୍ତୀ ରାଜ୍ୟ ଗୁଡ଼ିକରେ ପୁଣି ଥରେ ସମ୍ଭାବ୍ୟ ଯୁଦ୍ଧ ପରିସ୍ଥିତିକୁ ଦୃଷ୍ଟିରେ ରଖି ପୁଣି ଥରେ ମକ୍ ଡ୍ରିଲ୍ ପାଇଁ ପ୍ରସ୍ତୁତି କରାଯାଇଥିଲା । ପଞ୍ଜାବ, ହରିୟାଣା, ଗୁଜୁରାଟ, ରାଜସ୍ଥାନ ଏବଂ କେନ୍ଦ୍ର ଶାସିତ ଅଞ୍ଚଳ ହେବାକୁ ଚଣ୍ଡିଗଡ଼ରେ ହେବାକୁ ଥିବା ମକ୍ ଡ୍ରିଲ୍ କୁ ଗୁରୁବାର ପାଇଁ ସ୍ଥଗିତ ରଖାଯାଇଛି । ପ୍ରଶାସନିକ କାରଣ ପାଇଁ ମକ୍ ଡ୍ରିଲ୍ କୁ ଘୁଞ୍ଚାଇ ଦିଆଯାଇଥିବାର ସୂଚନା ରହିଛି ।
ହରିୟାଣା ସରକାରଙ୍କ ପକ୍ଷରୁ ସୂଚନା ଦିଆଯାଇଛି ଯେ, କେନ୍ଦ୍ର ଗୃହ ମନ୍ତ୍ରଣାଳୟର ନିର୍ଦ୍ଦେଶ କ୍ରମେ ହରିୟାଣା ଗୃହ ବିଭାଗ ଯୁଦ୍ଧ ପରିସ୍ଥିତି ମୁକାବିଲା ପାଇଁ ହେବାକୁ ଥିବା ମକ୍ ଡ୍ରିଲକୁ ସ୍ଥଗିତ ରଖିଛି । ସେହିପରି ଚଣ୍ଡିଗଡ଼ ଓ ରାଜସ୍ଥାନ ପ୍ରଶାସନ ମଧ୍ୟ ଗୁରୁବାର କୌଣସି ବ୍ଲାକ୍ ଆଉଟ୍ କିମ୍ବା ମକ୍ ଡ୍ରିଲ୍ କରାଯିବା ନାହିଁ ବୋଲି କହିଛି । ହରିୟାଣାରେ ୨୨ ଜିଲ୍ଲା ଓ ରାଜସ୍ଥାନର ୪୧ ଜିଲ୍ଲାରେ ମକ୍ ଡ୍ରିଲ୍ ହେବାର ଥିଲା ।
କେନ୍ଦ୍ର ସରକାରଙ୍କ ନିର୍ଦ୍ଦେଶ ପରେ ପରବର୍ତ୍ତୀ ତାରିଖ ଖୁବ ଶୀଘ୍ର ଘୋଷଣା କରାଯିବ ବୋଲି କୁହାଯାଇଛି । ଅପରପକ୍ଷରେ ପଞ୍ଜାବରେ ଜୁନ୍ ୩ ତାରିଖରେ ମକ୍ ଡ୍ରିଲ୍ ଅଭ୍ୟାସ ପାଇଁ ଦିନ ଧାର୍ଯ୍ୟ ହୋଇଛି । ସେହିପରି ଗୁଜରାଟରେ ଆସନ୍ତାକାଲି ପାଇଁ ମକ୍ ଡ୍ରିଲ୍ କରିବାକୁ ନିଷ୍ପତ୍ତି ହୋଇଛି ।
ଏଠାରେ ଉଲ୍ଲେଖ ଯୋଗ୍ୟ, ଏପ୍ରିଲ ୨୨ ରେ ପହଲଗାମରେ ଆତଙ୍କବାଦୀ ଆକ୍ରମଣରେ ୨୬ ଜଣ ପର୍ଯ୍ୟଟକ ପ୍ରାଣ ହରାଇଥିଲେ । ଦୁଇ ପଡ଼ୋଶୀ ରାଷ୍ଟ୍ର ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧ ପରିସ୍ଥିତି ସୃଷ୍ଟି ହୋଇଥିଲା । ଦେଶର ବିଭିନ୍ନ ରାଜ୍ୟରେ ଯୁଦ୍ଧ ପରିସ୍ଥିତିର ମୁକାବିଲା ପାଇଁ ମକ୍ ଡ୍ରିଲ୍ କରାଯାଇଥିଲା । ଏହାରି ମଧ୍ୟରେ ମେ ୭ ରେ ଅପରେସନ୍ ସିନ୍ଦୂର ଜରିଆରେ ଭାରତୀୟ ସେନା 9ଟି ଆତଙ୍କବାଦୀଙ୍କ ଆଡ୍ଡାକୁ ଧ୍ୱଂସ କରିଥିଲେ । ଯେଉଁଥିରେ ଆତଙ୍କବାଦୀଙ୍କ ମେରୁଦଣ୍ଡ ଭାଙ୍ଗିଯାଇଥିଲା । ପାକିସ୍ତାନ ଭାରତର କାର୍ଯ୍ୟାନୁଷ୍ଠାନରେ ପ୍ରତିଶୋଧ ପରାୟଣ ହୋଇ ପାଲଟା ଆକ୍ରମଣ କରିଥିଲା । ଯେଉଁଥିରେ ପାକ୍ ୩୦୦-୪୦୦ରୁ ଅଧିକ ଡ୍ରୋନ୍ ଏବଂ ମିସାଇଲ୍ ଦ୍ୱାରା ଭାରତକୁ ଟାର୍ଗେଟ୍ କରିଥିଲା । ମାତ୍ର ଗୋଟିଏ ସଫଲ ହୋଇପାରି ନ ଥିଲା ।
