ମନୁଷ୍ୟ ଶରୀରକୁ ସୁସ୍ଥ ରଖିବା ପାଇଁ ଯୋଗର ସୃଷ୍ଟି । ଆସନରେ ଏମିତି ଅନେକ ଗୁଣ ରହିଛି, ଯାହା ପ୍ରକୃତିରୁ ମିଳୁଥିବା ଗୁଣର ପ୍ରତିରୂପ ମଧ୍ୟ । ଅର୍ଦ୍ଧ ଚକ୍ରାସନ ହେଉଛି ଚକ୍ରାସନର ଅନ୍ୟ ଏକ ଭାରିଏଣ୍ଟା । ଏହା କରିବା ଦ୍ୱାରା ଶରୀରର ନମନୀୟତା ବଢିଥାଏ । ଯୋଗାସନ କରିବା ଦ୍ୱାରା ଶରୀର ଓ ଅଣ୍ଟାର ଯନ୍ତ୍ରଣା ମଧ୍ୟ କମ୍ ହୋଇଥାଏ । ଯୋଗ ସମୟରେ ଆଗପଛ ଝୁଙ୍କିବା ଦ୍ୱାରା ଫୁସ୍ଫସ୍ ଓ ଛାତିର ମାଂସପେଶୀ ମଜଭୁତ ହୋଇଥାଏ । ସକାଳ ବା ସନ୍ଧ୍ୟା କୌଣସି ସମୟରେ ଯୋଗ କରାଯାଇପାରିବ । କିନ୍ତୁ ୪/୫ ଘଣ୍ଟା ପେଟ ଖାଲି ଥିବା ଦରକାର ।
ଅର୍ଦ୍ଧ ଚକ୍ରାସନ :
-ଯୋଗ ମ୍ୟାଟ୍ରେ ସିଧା ହୋଇ ଠିଆ ହୋଇଯାନ୍ତୁ ।
– ପାଦକୁ ସିଧା ରଖିବା ସହ ହାତକୁ ଶରୀରରେ ଲଗାଇ ରଖନ୍ତୁ ।
– ନିଜ ଓଜନକୁ ଦୁଇ ପାଦ ଉପରେ ସନ୍ତୁଳିତ କରି ରଖନ୍ତୁ ।
– ଏବେ ପ୍ରଶ୍ୱାସକୁ ଭିତରକୁ ଟାଣି ଦୁଇ ହାତକୁ ଉପରକୁ ଉଠାନ୍ତୁ । ଦୁଇ ହାତର ପାପୁଲିକୁ ପରପ୍ସରକୁ ସାମ୍ନା କରି ରଖନ୍ତୁ ।
– ଏବେ ନିଶ୍ୱାସକୁ ଛାଡିବା ସହ ପେଟ ଅଂଶକୁ ଆଗ ଆଡକୁ ମୋଡନ୍ତୁ ।
– ଦୁଇ ହାତ ଓ ଶରୀରକୁ ପଛକୁ ଟାଣିବା ସହ କାନ, କହୁଣୀ ଓ ଆଣ୍ଠୁକୁ ସିଧା ରଖିବାକୁ ପ୍ରୟାସ କରନ୍ତୁ ।
– ମୁଣ୍ଡ ଓ ଛାତିକୁ ଉପର ଆଡକୁ ଉଠାଇବା ସହ ହାତକୁ ପଛ ଆଡେ ତଳକୁ ଟାଣନ୍ତୁ । ଏହି ସମୟରେ ନିଶ୍ୱାସ-ପ୍ରଶ୍ୱାସ ରୋକନ୍ତୁ ନାହିଁ ।
– ଏବେ ପ୍ରଶ୍ୱାସ ଭିତରକୁ ନେବା ସହ ପ୍ରାରମ୍ଭିକ ମୁଦ୍ରାକୁ ଫେରି ଆସନ୍ତୁ । ପ୍ରଥମେ କୌଣସି ଯୋଗ ପ୍ରଶିକ୍ଷକଙ୍କ ଦ୍ୱାରା ଟ୍ରେନିଂ ନିଅନ୍ତୁ ।
ଫାଇଦା :
ଅର୍ଦ୍ଧା-ଚକ୍ରାସନ କରିବା ଦ୍ୱାରା କାନ୍ଧ, ଛାତି ଓ ମାଂସପେଶୀ ନମନୀୟ ହୋଇଥାଏ । ଏହି ଯୋଗ ଦ୍ୱାରା ପେଟ, ପାଦ, କାନ୍ଧ ଓ ମେରୁଦଣ୍ଡ ହାଡ଼ ଆଦି ମଜଭୁତ ହୋଇଥାଏ । ସେହିପରି ପିଠିର ତଳ ଅଂଶରେ ହେଉଥିବା ଯନ୍ତ୍ରଣା ମଧ୍ୟ କମ୍ ହୋଇଥାଏ । ଏହି ଆସନ ଅଭ୍ୟାସ କରିବା ଦ୍ୱାରା ଚିନ୍ତା ଓ ଚାପକୁ କମ୍ କରାଯାଇପାରିବ ।
ସାବଧାନ :
ଅଣ୍ଟା, ମେରୁଦଣ୍ଡ ହାଡ଼ ଓ ବେକ ଆଦିରେ ଯନ୍ତ୍ରଣା ଥିଲେ ଏହି ଆସନ କରନ୍ତୁ ନାହିଁ । ଆର୍ଥ୍ରାଇଟିସ୍ ଥିଲେ ବିନା ଯୋଗଗୁରୁରେ ଏହି ଆସନ କରନ୍ତୁ ନାହିଁ । ସେହିପରି ହୃଦୟ ଓ ଉଚ୍ଚ ରକ୍ତଚାପ ସମସ୍ୟା ଥିଲେ ମଧ୍ୟ ଏହି ଆସନ କରନ୍ତୁ ନାହିଁ ।
