ଆଇସିୟୁ ଭେଣ୍ଟିଲେଟରରେ ଏୟାର ହଷ୍ଟେସଙ୍କୁ ଦୁଷ୍କର୍ମ ଅଭିଯୋଗ । ହରିୟାଣ ଗୁରୁଗ୍ରାମରେ ଥିବା ଜଣାଶୁଣା ଡାକ୍ତରଖାନାରୁ ଆସିଛି ଏପରି ଅଭିଯୋଗ । ହସ୍ପିଟାଲର ଜଣେ କର୍ମଚାରୀ ଏପରି କାଣ୍ଡ ଭିଆଇଥିବା ଜଣାପଡିଛି । କୋଲକତାର ଆରଜି କର ହସପିଟାଲରେ ଘଟିଥିବା ଦୁଷ୍କର୍ମ ମାମଲା ଏଯାଏଁ ଥମି ନଥିବା ବେଳେ ପୁଣି ହସପିଟାଲରେ ଏଭଳି ଏକ କାଣ୍ଡ ଘଟିଛି ।
୪୬ ବର୍ଷୀୟା ଏୟାର ହଷ୍ଟେସ ଜଣଙ୍କ ଗତ ଏପ୍ରିଲ ୫ ତାରିଖ ଦିନ ଗୁରୁଗ୍ରାମକୁ ଟ୍ରେନିଂ ପାଇଁ ଆସିଥିବା ବେଳେ ଏକ ହୋଟେଲରେ ରହିଥିଲେ । ଗାଧୋଇବା ବେଳେ ସୁଇମିଂ ପୁଲରେ ବୁଡି ଯାଇ ଗୁରୁତର ହୋଇଥିଲେ । ତାଙ୍କୁ ସଙ୍ଗେ ସଙ୍ଗେ ହସ୍ପିଟାଲରେ ଭର୍ତ୍ତି କରାଯାଇଥିଲା । ତେବେ ଅବସ୍ଥା ସଙ୍କଟାପନ୍ନ ଥିବାରୁ ସେଠାରେ ତାଙ୍କୁ ଆଇସିୟୁ ଭେଣ୍ଟିଲେଟରରେ ରଖାଯାଇଥିଲା ।
ମହିଳା ଜଣଙ୍କ ଭେଣ୍ଟିଲେଟରରେ ଚେତାଶୂନ୍ୟ ଅବସ୍ଥାରେ ଥିବା ବେଳେ ହସ୍ପିଟାଲ କର୍ମଚାରୀ ତାଙ୍କୁ ଯୌନ ନିର୍ଯାତନା ଦେଇଥିଲେ । ମହିଳା ଜଣଙ୍କ ଜାଣିପାରୁଥିଲେ ମଧ୍ୟ ଶରୀର ଚଳପ୍ରଚଳ ପାଇଁ ଅକ୍ଷମ ଥିବାରୁ ପ୍ରତିବାଦ କରିପାରୁଥିଲେ । ଏପ୍ରିଲ ୧୩ରେ ହସ୍ପିଟାଲରୁ ଡିସଚାର୍ଜ ହେବା ପରେ ସ୍ବାମୀଙ୍କୁ ସବୁ କଥା କହିଥିଲେ ପୀଡିତା । ପରେ ଥାନାରେ ଏକ ଲିଖିତ ମାମଲା ଦାଏର କରିବା ପରେ ପୋଲିସ ଉକ୍ତ ହସ୍ପିଟାଲର କର୍ମଚାରୀଙ୍କୁ ପଚରାଉଚରା କରିବା ସହ ସିସିଟିଭି ଯାଞ୍ଚ କରୁଛି ।
ମହିଳାଙ୍କ ଅଭିଯୋଗ ଅନୁଯାୟୀ, ୫ ଏପ୍ରିଲ ତାଙ୍କ ସ୍ବାମୀ ଚିକିତ୍ସା ପାଇଁ ଏକ ହସପିଟାଲରେ ଭର୍ତ୍ତି କରିଥିଲେ । ତାଙ୍କୁ ୧୩ ଏପ୍ରିଲରେ ହସପିଟାଲରୁ ଡିସଚାର୍ଜ ମିଳିଥିଲା । ତେବେ ଚିକିତ୍ସା ସମୟରେ ଏପ୍ରିଲ ୬ ତାରିଖରେ ମହିଳା ଜଣକ ଭେଣ୍ଟିଲେଟରରେ ଥିବା ବେଳେ ହସପିଟାଲର କିଛି କର୍ମଚାରୀ ଦୁଷ୍କର୍ମ କରିଥିଲେ । ଭେଣ୍ଟିଲେଟରେ ଥିବା ଯୋଗୁଁ କଥା କହିପାରୁନଥିଲି । ଏହି ଘଟଣା ସମୟରେ ଦୁଇ ଜଣ ନର୍ସ ମଧ୍ୟ ପାଖରେ ଥିବା ମହିଳା ଜଣକ ଅଭିଯୋଗ କରିଛନ୍ତି ।
ସେପଟେ ଘଟଣା ନେଇ ପ୍ରତିକ୍ରିୟା ରଖିଛନ୍ତି ହସପିଟାଲ କର୍ତ୍ତୃପକ୍ଷ । ହସପିଟାଲ ପକ୍ଷରୁ କୁହାଯାଇଛି, ଏଯାଏ କୌଣସି ଅଭିଯୋଗ ପ୍ରମାଣିତ ହୋଇନାହିଁ । ଆମେ ତଦନ୍ତରେ ସମ୍ପୂର୍ଣ୍ଣ ସହଯୋଗ କରୁଛୁ । ହସ୍ପିଟାଲରୁ ସିସିଟିଭି ଫୁଟେଜ୍ ସମେତ ସମସ୍ତ ପ୍ରାସଙ୍ଗିକ କାଗଜପତ୍ର ପୋଲିସକୁ ହସ୍ତାନ୍ତର କରାଯାଇଛି ।
