ରାଜ୍ୟକୁ ପୁଞ୍ଜିନିବେଶ ଟାଣିବାକୁ ଦିଲ୍ଲୀ ଗସ୍ତରେ ଯାଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ଦିଲ୍ଲୀରେ ଆୟୋଜିତ ଓଡ଼ିଶା ଇନଭେଷ୍ଟର୍ସ ମିଟ୍ର ପ୍ରଥମ ଦିନରେ ସେ ୧୪ ପ୍ରମୁଖ ଶିଳ୍ପ ପ୍ରତିନିଧିଙ୍କୁ ଭେଟିଛନ୍ତି । ବିଭିନ୍ନ ପୁଞ୍ଜିପତିଙ୍କ ସହ ୱାନ୍ ଟୁ ୱାନ୍ ବୈଠକ କରିଛନ୍ତି । ଏଥିରୁ ୩୦ହଜାର ୫୯୫ କୋଟିର ପୁଞ୍ଜିନିବେଶ ପ୍ରସ୍ତାବ ମିଳିଛି । ମୋଟ ୪୮ ହଜାର ଲୋକଙ୍କ ନିଯୁକ୍ତି ପାଇଁ ସମ୍ଭାବନା ସୃଷ୍ଟି ହୋଇଛି ।
ସୋମବାର ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ରାଜ୍ୟ ସରକାର ୧୧ଟି ଏମ୍ଓୟୁ ସ୍ୱାକ୍ଷର କରିଛନ୍ତି । ମୋଟ ୨୭ ହଜାର ୫୯୫କୋଟିର ନିବେଶ ପାଇଁ ଏହି ଏମ୍ଓୟୁ ହୋଇଛି । ଏହି ସବୁ ପ୍ରକଳ୍ପ କାର୍ଯ୍ୟକାରୀ ହେଲେ ପ୍ରାୟ ୨୭୦୦ ଲୋକ ନିଯୁକ୍ତି ସୁଯୋଗ ପାଇବେ ବୋଲି ସରକାର ସୂଚନା ଦେଇଛନ୍ତି ।
ନୋଏଡ଼ାରେ ଥିବା ଏଚସିଏଲ୍ ଟେକ୍ କ୍ୟାମ୍ପସ୍ ବୁଲିବା ସହ ଏଚସିଏଲ୍ ଟେକ୍ନୋଲୋଜିସ୍ର ଅଧ୍ୟକ୍ଷା ରୋସନୀ ନାଦାରଙ୍କ ସହ ଆଲୋଚନା କରିଛନ୍ତି ମୁଖ୍ୟମନ୍ତ୍ରୀ । କ୍ୟାମ୍ପସ୍ରେ ଥିବା ଏଆଇ ଲାବ୍, ଆଇଓଟି ଲାବ୍ ଦେଖିଥିଲେ । ଓଡ଼ିଶାରେ ଏଚସିଏଲ୍ର ଟେକ୍ କ୍ୟାମ୍ପସ୍ ସହ ଏକ ବିଶ୍ୱବିଦ୍ୟାଳୟ ପାଇଁ ପ୍ରସ୍ତାବ ଦିଆଯାଇଛି ।
ମୁଖ୍ୟମନ୍ତ୍ରୀ ଦିଲ୍ଲୀର ତାଜ ପ୍ୟାଲେସ୍ ହୋଟେଲରେ କିରି ଇଣ୍ଡଷ୍ଟ୍ରିଜର ଏମ୍ଡି ମନୀଷ କିରି, ହିମାଦ୍ରି ସ୍ପେସିଆଲିଟି କେମିକାଲସ୍ ଲିମିଟେଡ୍ ସିଇଓ ଅନୁରାଗ ଚୌଧୁରୀ, ଏନ୍ଏକ୍ସପି ଟେକ୍ନୋଲୋଜିର ନିର୍ଦ୍ଦେଶକ ଅଙ୍କିତ ପାଲ୍ ଓ ଗୋକଲ ଦାସ ଏକ୍ସପୋର୍ଟସର ନିର୍ଦ୍ଦେଶକ ପ୍ରଭାତ କୁମାର ସିଂହ, ଚୌଗୁଲେ ଗ୍ରୁପ୍, ଆଇଆରଇଏଲ୍, ଏସଏଲଏମଜି ବିଭରଜେସ୍, ପତଞ୍ଜଳି ଅଧୀନରେ ଥିବା ରୁଚି ସୋୟା ଫୁଡସ୍ ଲିଃ, ଆଇନକ୍ସ ଜିଏଫଏଲ୍ ଗ୍ରୁପ୍, କ୍ୱାଣ୍ଟ ସୋଲାର ଭଳି ପ୍ରତିଷ୍ଠିତ ଶିଳ୍ପ ସଂସ୍ଥାର ପ୍ରତିନିଧିଙ୍କୁ ଭେଟିଛନ୍ତି । ରାଜ୍ୟରେ ପୁଞ୍ଜନିବେଶ ପାଇଁ ପର୍ଯ୍ୟାପ୍ତ ସୁବିଧା ସୁଯୋଗ ଓ ଶିଳ୍ପ ଅନୁକୂଳ ବାତାବରଣ ରହିଛି । ଏଠାକୁ ଆସି ପୁଞ୍ଜିନିବେଶ କରିବାକୁ ସେ ସମସ୍ତଙ୍କୁ ଆହ୍ୱାନ କରିଛନ୍ତି । ଆମ ସରକାର ସବୁ ସହଯୋଗ କରିବେ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ମଙ୍ଗଳବାର ଦେଶର ତିନି ପ୍ରମୁଖ ତୈଳ କମ୍ପାନୀ ସହ ଏମ୍ଓୟୁ ହେବ । ପାରାଦୀପରେ ମେଗା ଡୁଆଲ ଫିଡ୍ କ୍ରାକର୍ ପାଇଁ ଆଇଓସିଏଲ୍ ସହ ଚୁକ୍ତି ହେବ । ଚଣ୍ଡିଖୋଲରେ ଅଶୋଧିତ ତୈଳଭଣ୍ଡାର କରିବ ଇଣ୍ଡିଆନ ଷ୍ଟ୍ରାଟେଜିକ୍ ପେଟ୍ରୋଲିୟମ୍ ରିଜର୍ଭ ଲିଃ । ଗୋପାଳପୁରରେ ଏଲଏନ୍ଜି ଟର୍ମିନାଲ ପ୍ରତିଷ୍ଠା କରିବ ପେଟ୍ରୋନେଟ୍ ଏଲଏନଜି ଲିଃ । ଏହି ଏମଓୟୁ ଜରିଆରେ ପେଟ୍ରୋକେମିକାଲସ୍ ଓ କେମିକାଲସ୍ କ୍ଷେତ୍ରରେ ଓଡ଼ିଶାକୁ ଅଗ୍ରଣୀ ହବ୍ କରିବାକୁ ସରକାର ଯୋଜନା କରିଛନ୍ତି । ଏହା ଜରିଆରେ ଦେଶର ସାମଗ୍ରିକ ବିକାଶରେ ଭାଗିଦାରୀ ହେବାକୁ ଯୋଜନା ହୋଇଛି । ଏଠାରେ ଶସ୍ତା ଓ ନିର୍ଭରଯୋଗ୍ୟ ଶକ୍ତି ଯୋଗାଣ ସୁବିଧା ରହିଛି ।
ଶାନ୍ତିପୂର୍ଣ୍ଣ ଶିଳ୍ପ ବାତାବରଣ ସହ ବିଭିନ୍ନ ନିୟାମକ ସଂସ୍ଥାକୁ ନେଇ ନିଶ୍ଚିତତା ରହିଛି । ବନ୍ଦର ଓ ବନ୍ଦରଭିତ୍ତିକ ଭିତ୍ତିଭୂମି ସୁବିଧା ଅଛି । ରାଜ୍ୟରେ ପର୍ଯ୍ୟାପ୍ତ ଖଣିଜ ସମ୍ବଳ ମହଜୁଦ ଅଛି । ଏମଏସ୍ଏମଇ ପାର୍କର ସୁବିଧା ଅଛି । ଦକ୍ଷ ମାନବସମ୍ବଳ ସହିତ ବିଶ୍ୱସ୍ତରୀୟ ଦକ୍ଷତା ବିକାଶ ଭିତ୍ତିଭୂମି ଯୋଗୁ ଓଡ଼ିଶାରେ ଶିଳ୍ପାୟନର ବିରାଟ ସମ୍ଭାବନା ଅଛି ବୋଲି ସରକାର ସବୁ ନିବେଶକାରୀଙ୍କୁ କହିଛନ୍ତି । ମୁଖ୍ୟମନ୍ତ୍ରୀଙ୍କ ସହ ଶିଳ୍ପ ମନ୍ତ୍ରୀ ସମ୍ପଦ ସ୍ୱାଇଁ, ମୁଖ୍ୟ ଶାସନ ସଚିବ ମନୋଜ ଆହୁଜା ଓ ଶିଳ୍ପ ସଚିବ ହେମନ୍ତ ଶର୍ମା ଶିଳ୍ପପତିଙ୍କୁ ଭେଟିଥିଲେ ।
