ଭୁବନେଶ୍ଵର : ରାଜ୍ୟରେ ଆହୁରି ବଢିବ ରେଳ ଭିତ୍ତିଭୂମି । ଓଡିଶା ପାଇଁ ଆଉ ୨ଟି ନୂଆ ରେଳ ପ୍ରକଳ୍ପକୁ ମଞ୍ଜୁରୀ କରିଛି କେନ୍ଦ୍ର କ୍ୟାବିନେଟ । କେନ୍ଦ୍ର ସରକାରଙ୍କ ଅର୍ଥନୈତିକ ବ୍ୟାପାର ସମ୍ପର୍କିତ କ୍ୟାବିନେଟ୍ କମିଟି ଆଜି ୪ଟି ରେଳ ପ୍ରକଳ୍ପ ମଞ୍ଜୁର କରିଥିବା ବେଳେ ୨ଟି ପ୍ରକଳ୍ପ ଓଡିଶା ପାଇଁ ରହିଛି ।
ସମ୍ବଲପୁର-ଜରପଡା ତୃତୀୟ ଓ ଚତୁର୍ଥ ଲାଇନ୍ ଏବଂ ଝାରସୁଗୁଡା- ଶାସନ ତୃତୀୟ ଓ ଚତୁର୍ଥ ଲାଇନ୍ କୁ ମଞ୍ଜୁର କରାଯାଇଛି । ଉଭୟ ପ୍ରକଳ୍ପ ପାଇଁ ୫ ହଜାର ୧୦୪ କୋଟି ଟଙ୍କା ବିନିଯୋଗ ହେବ । ସମ୍ବଲପୁର-ଜରପଡା ପ୍ରକଳ୍ପ ପାଇଁ ୩ ହଜାର ୯୧୭ କୋଟି ଟଙ୍କା ବିନିଯୋଗ ହେବାକୁ ଥିବାବେଳେ ଝାରସୁଗୁଡା-ଶାସନ ପ୍ରକଳ୍ପ ପାଇଁ ୧,୧୮୭ କୋଟି ଟଙ୍କା ବିନିଯୋଗ ହେବ ।
ଏହା ଦ୍ବାରା ସମ୍ବଲପୁର, ଅନୁଗୋଳ ଓ ଝାରସୁଗୁଡା ଜିଲ୍ଲା ଗୁଡିକରେ ରେଳ ପରିବହନ କ୍ଷେତ୍ରରେ ବ୍ୟାପକ ଗତିଶୀଳତା ଆସିବ ବୋଲି କୁହାଯାଇଛି। ଏହି ଦୁଇ ପ୍ରକଳ୍ପ ପାଇଁ ପ୍ରଧାନମନ୍ତ୍ରୀ ଓ ରେଳମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ ।
