ସଂଚାର ବ୍ୟୁରୋ: କୋଲକାତାର ଏକ ସରକାରୀ ଡାକ୍ତରଖାନାରେ ଜଣେ ମହିଳା ଟ୍ରେନି ଡାକ୍ତରଙ୍କୁ ନେଇ ତମ୍ବିତୋଫାନ। ପୋଷ୍ଟମର୍ଟମ ରିପୋର୍ଟ ଅନୁସାରେ ତାଙ୍କୁ ହତ୍ଯା କରାଯିବା ପୂର୍ବରୁ ଯୌନ ନିର୍ଯାତନା ଦିଆଯାଇଥିଲା ବୋଲି ସ୍ପଷ୍ଟ ହୋଇଛି। ପୋଲିସ ସୂଚନା ଅନୁସାରେ ପିଜି ଡାକ୍ତର ଛାତ୍ରୀଜଣକ ଆରଜି କର ମେଡିକାଲ କଲେଜ ଆଣ୍ଡ ହସ୍ପିଟାଲରେ ଗତ ଗୁରୁବାର ବିଳମ୍ବିତ ରାତିରେ ଭୋଜନ କରିଥିଲେ। ପରେ ସେ ତୃତୀୟ ମହଲାରେ ଥିବା ସେମିନାର ହଲକୁ ଯାଇଥିଲେ। ପରଦିନ ସକାଳେ ୩୧ ବୟସ୍କା ଛାତ୍ରୀଙ୍କୁ ଚେତାଶୂନ୍ଯ ଅବସ୍ଥାରେ ଠାବ କରାଯାଇଥିଲା। ଏନେଇ ଏକ ଦୁଷ୍କର୍ମ ଓ ହତ୍ଯା ମାମଲା ରୁଜୁ ହୋଇଥିଲା ଏବଂ ସଞ୍ଜୟ ରୟ ନାମକ ଜଣେ ଯୁବକକୁ ଗିରଫ କରାଯାଇଥିଲା। ମୃତ ଡାକ୍ତରୀ ଛାତ୍ରଙ୍କ ପୋଷ୍ଟମର୍ଟମର ଭିଡିଓଗ୍ରାଫି ହୋଇଥିଲା। ମୃତକଙ୍କ ଗୋପନ ଅଙ୍ଗ, ଓଠ, ମୁହଁ, ବେକ, ପେଟ, ଆଙ୍ଗୁଠି ଓ ଗୋଇଠିରେ କ୍ଷତଚିହ୍ନ ରହିଥିଲା। ଅଭିଯୁକ୍ତଜଣକ ଜଣେ ବାହାର ବ୍ଯକ୍ତି ଏବଂ ସେ ହସ୍ପିଟାଲ ଭିତରକୁ ଅବାଧ ପ୍ରବେଶ କରୁଥିଲା ବୋଲି ସୂଚନା ମିଳିଛି। ସେପଟେ ଅଭିଯୁକ୍ତ ବିରୋଧରେ କଡା କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ମୁଖ୍ଯମନ୍ତ୍ରୀ ମମତା ବାନାର୍ଜୀ। ଏହି ଘଟଣାର ସିବିଆଇ ତଦନ୍ତ ଦାବି କରିଛି ବିଜେପି। ସେପଟେ ଏହି ଘଟଣାରେ ମେଡିକାଲ କଲେଜର ନର୍ସମାନେ ଓ କଂଗ୍ରେସ କର୍ମୀ କରିଛନ୍ତି ପ୍ରତିବାଦ।
